晚晚足戰連場，莫講話老公，連我都捱更抵夜睇波！早幾日睇報紙，知道內地醫院多咗好多患乾眼症病人，大部分都係睇波睇出事，咁啱老公尋日就同我提過話眼乾乾，嚇得我都唔敢怠慢，拿拿聲上網搵料。原來要紓緩眼睛不適，最好先從環境因素埋手，首先室內冷氣唔好太凍，更可使用放濕機保持室內濕度，簡單啲擺杯水都掂。最理想當然係有足夠睡眠，不過呢排都冇乜邊個會夠瞓，惟有飲多啲水、保持淚水分泌，咁就可減低眼睛乾澀嘅情況。