自從1984年阿諾舒華辛力加拋出一句︰「I'll be back！」，《未來戰士》系列就長拍長有。雖然咁多年嚟出現過唔少角色，不過要數至入腦奸角，必定係第2集嘅液晶體機械人T-1000，任你點射點爆都殺佢唔死，咁高科技嘅機械人，依家千零蚊元就可以帶番屋企！

其實T-1000唔係第一次被製成玩具，以前美國Figure廠Sideshow都造過，不過Body完全唔啱比例，造出嚟真係得啖笑，今次換咗Hot Toys，成件事即刻唔同晒，可以話係目前最完美嘅T-1000玩具。先講頭雕，由Jeon Young Tae操刀，仲有JC Hong上色，加埋Kojun監修，面相激似真人，頭髮就由多層軟膠製成，夠晒Layer。放心啦，HT梗知T-1000最深入民心嘅唔係靚仔樣，而係爆頭Look，隨盒送多一個被爆開兩半嘅頭雕，「傷口」仲會露出仿金屬物料，跟足齣戲啦！

隨盒仲有騎警制服畀玩家替換，連埋頭盔及黑超等Parts，可惜欠部哈利電單車。	《未來戰士》粉絲一定記得T-1000畀人劈開個頭都唔死得，HT亦造埋呢個經典Look。	頭雕由韓籍大師Jeon Young Tae製作，似足演員Robert Patrick，最明顯係招牌嘅兜風耳。

中彈位置任你改

電影描述T-1000係用水銀製成嘅超高科技機械人，就算畀阿諾用霰彈槍連轟都絲毫無損。為咗重現呢幕咁經典嘅屈機形態，HT特別喺素體前面貼咗鐵片，仲造埋9粒不同大小嘅波紋形子彈窿，全部背後都有磁貼，可以隨意貼喺素體身上，中彈前同中彈後嘅造型都完全兼顧到，唔寫個服字畀HT都唔得。

子彈窿背後有磁貼，任你貼喺素體正面嘅任何位置。

沿用30cm TrueType素體，提供30個關節位，相中係佔戲最多嘅巡警服。

扮警察兩個Look

提起造型，HT T-1000就有巡警及騎警兩套制服，前者有仿皮皮帶、皮鞋、彈筴及手扣等多種Parts，後者就有頭盔、黑超電筒及對講機，加埋手槍、輕機槍及3款變形「手刀」做武器，剩係配件都有排玩啦！

巡警及騎警服各有一條仿皮皮帶，兩條都掛到對講機、電筒及槍袋等配件。	放大圖片	未計4對替換式手掌，槍都有兩把，加埋手扣、對講機、電筒，Parts夠晒豐富。

爆頭預告

除咗劈頭Look，其實T-1000仲有多一款穿頭Look嘅特別版頭雕，不過只會喺今年動漫節推出嘅特別版Sarah Connor隨盒奉送，後者定價$980。

放大圖片	放大圖片	1/4 Iron Man Mark Ⅴ Collectible Bust 零售價：$520 預訂價：$490 推出日期：今年第3季

Mark Ⅴ胸像接棒登場

繼早前嘅1/4 Iron Man Mark Ⅳ及War Machine胸像後，大家都估HT一定會出埋Mark Ⅴ及Ⅵ，果然估啱咗……一半先啦！事關Mark Ⅴ胸像啱啱曝光，至於Mark Ⅵ仲要等多陣。講番Mark Ⅴ胸像，比例大咗咁多，細節位當然比12" Figure造得更多、更講究，至於Mark Ⅴ獨有嘅紅×銀配色當然跟到足，之前已經訂咗Man Mark Ⅳ及War Machine胸像嘅粉絲，冇理由中途放棄吧！

Action Figure之祖

話說上世紀60年代美國玩具廠商「孩之寶」（Hasbro）見到Barbie深受女孩歡迎，有意打造男孩版的着衫玩偶，於是以美軍的特種部隊為題材，設計出可以更換制服、武器，又有關節的12"可動人偶，並以「G.I.Joe」作為系列名稱，被視為當今Action Figure的始祖。順帶一提，孩之寶在80年代為G.I.Joe加開3.75"的人偶系列，並製作了同名的漫畫和動畫劇集作宣傳，去年推出的《G.I.Joe：Rise of the Cobra》，則是G.I.Joe首輯由真人飾演的荷里活電影。

查詢︰2388 4677（玩具狂熱）