呢排荷里活英雄片一浪接一浪，先有《鋼鐵奇俠2》，再嚟《波斯王子︰超時空之戰》，後者耗資1億5,000萬美元拍成，將男主角積佳蘭賀（Jack Benjamin Gyllenhaal）打造到識飛簷走壁鬼咁有型；若果閣下想將呢個型男帶返屋企，依家千幾蚊就有交易，事關HT已將佢幻化成12" Action Figure，仲送多兩套衫畀你替換，斯文或粗獷Look，任君選擇！

Muscular Body晒胸肌

《波斯王子︰超時空之戰》由《斷背山》嘅斯文型男積佳蘭賀主演，他為部戲日操夜操，練就一身Fit爆身形，重現王子嘅完美體態；HT都唔輸蝕，選用新款Muscular Body，即係之前用喺狼人身上嗰款，特點係胸位用咗軟皮，下半身係傳統嘅PVC硬膠，呈現肌肉感之餘，關節位就增加到30個，比舊式包膠Body靈活、「肉感」得多。

波斯王子用咗Muscular Body，上半身係肌肉Body，全身就有30個關節，擺咩甫士都得。

仿皮戰衣其實用塑膠製成，表面壓咗精細花紋，仔細得緊要。

逼真頭雕一Take過

頭雕方面，HT向來出名逼真，今次搵嚟名師Kojun操刀，佢擅長雕琢粗獷猛男，之前John Connor及狼人就係出自佢手筆，上色就交畀JC Hong，基本上跟真人有七、八成似。據講HT將Figure交畀迪士尼及積佳蘭賀審批時，佢哋都罕有地一Take過Pass，連官方都高度認同Figure嘅像真度。廠方表示為求盡善盡美，稍後再細執髮型，利用多層軟膠塑造貼服、自然嘅感覺。

背脊可以掛雙刀，未拔刀已經夠晒殺氣。	武器包括兩把長刀、兩把短刀及一把匕首，咪咁貪心啦，你見過波斯王子揸機關槍咩？	長靴可以成件拆出嚟，方便玩家換畀其他Figure着。

超期待沙漏匕首

服飾方面，着咗大半場戲嘅仿皮戰衣壓滿戰紋及各式雕花，皮帶用仿皮膠帶製成，跟埋啡色長褲、護臂及長靴；隨盒仲有文戲用嘅啡色長袍，跟足電影嘅圓角對襟剪裁，表面仲印咗大量波斯圖騰，中東味滿瀉！至於武器除咗有背脊嘅雙刀，以及腰間嘅兩把短刀，當然唔少得貫穿成套戲嘅「時之砂」匕首，HT仲話正式推出時，會用特別物料模仿刀柄內嘅沙漏效果，玩到咁盡，其他Figure廠點跟呀？

另備王子Look用嘅長袍、恤衫及紅色圍巾。	長袍印滿代表皇室圖騰，縫位車工又相當仔細，維持HT嘅一貫質素。	沿用狼人嘅肌肉Body，連心口毛都照搬，好Man！

查詢︰2388 4677（玩具狂熱）