香港與南非時差六小時，球迷又要準備捱夜睇波了！由本周五起的32強分組賽，以至7月12日的總決賽，全數63場，其中28場定於香港時間凌晨2時30分舉行。大家並非金睛火眼的齊天大聖，要應付一個月的足球不夜天，就要留意今次介紹的提神方法，相信總有一款幫到你！
Vuvuzela包嘈醒
不少人試過鬧鐘也鬧不醒，難道鐘聲未夠勁？不如試試改用Vuvuzela吧！這種南非特有的打氣喇叭，聲音特別煩人，去年洲際盃時，除東道主南非外，各洲的代表隊都已領教過。想知醒，何不錄下Vuvuzela的「煩音」，再當成手機鈴聲，繼而校正響鬧時間，想唔知醒都難！
溫馨提示：家有心情煩悶者勿用，事關Vuvuzela的確擾民。
薄荷凍上腦
薄荷出名醒神通腦，若嫌薄荷糖或薄荷茶都「未夠力」，不妨改用薄荷精油與開水攪勻，之後滲入毛巾，繼而擰至半乾並放入雪櫃冷藏，睇波期間昏昏欲睡，就取之敷在額頭或面上，當堂醒晒！
溫馨提示：對薄荷敏感者勿用，若然受得強力酸味的話，大可改食酸薑。
夏蕙姨出場
不少人看過恐怖片後，都會驚嚇得無法入眠，球賽前可考慮先煲這類影碟，荷里活製作固然選擇多，至於N年前的港產Cult片《迷失樂園》，單計何啟南餵夏蕙姨食雪條的兩分鐘一幕，恐怖程度直逼《猛鬼街》或《午夜凶鈴》，睇完想瞓都難！
溫馨提示：自問膽小者勿用，以免嚇至三魂唔見七魄。
打Game當演習
如一家大小、親朋戚友都想齊齊睇夜波，何不先來一場球賽演習、闔家歡打足球Game，實行二對二、甚至四對四，揀選球隊當然以緊接而來的球賽為準，提升投入度之餘，睇波時更有話題性。
溫馨提示：為他人着想，深宵打機或睇波，請收細音量。
茶包加重料
一杯熱烘烘的花旗參茶，是正氣的提神方法；若然不愛參味，大可改飲普洱茶，為求加強「持久力」，就要不惜工本，一杯茶落三個茶包、甚至四個茶包，提神效果隨時勁過「X牛」。
溫馨提示：落多少個茶包請量力而為，皆因要小心球賽過後還精神到無法入睡。
想精神要食飯
據尚營坊健康顧問高級營養師黃凱詩所講，球迷想夠精神睇波的話，便一定要吸收足夠的澱粉質和糖分，以一碗飯為計，最好一半糙米、一半白飯，有助儲足能量，有助減輕深夜睇波的疲倦度。除此之外，若有食消夜睇波的習慣，她建議晚餐的分量可減1/3；至於消夜菜式首選生果，溫馨提示：即使戒不掉薯片癮，最好揀選低脂口味了。
球星有Say
盧均宜 傑志
「若然要一晚睇足三場波，最好有大班朋友相伴，例如一邊打邊爐、一邊睇波，就不會有睡意了。」
林嘉緯 傑志
「我會早一點休息，養足精神睇夜波。今次我最睇好西班牙，其次是法國，後者的大賽經驗不容小覷。」
沈國強 沙田
「為了睇夜波，我會飲咖啡提神。今屆最期待的球員是美斯，可惜阿根廷的人腳參差，恐怕美斯獨力難支。」