三月開始多番啲好Game玩，打頭陣係EA出品嘅戰爭射擊遊戲《Battlefield Bad Company 2》。相比上一代《Bad Company》，今集收錄咗更多載具及組件，可以自行改裝，玩得更過癮，仲引來穿上一身性感軍Look嘅高海寧及沈卓盈來開戰，兩位靚女擺起Pose確實幾有氣勢。

距離上集推出都只不過年半多啲，《Battlefield Bad Company 2》就已經上場會Fans。今集「B」連隊隊員要在多個風格好唔同嘅環境下作戰，好似冰天雪地、叢林、村莊同水上等場景，秉承上集要將成個戰場徹底破壞嘅遊戲精神。

武器可以自行改裝，玩法變化甚多。	面對面打坦克，睇怕凶多吉少。	畫面表現好有水準，臨場感十足。

大量改裝 發揮創意

遊戲一大賣點係可以畀玩家有好大空間去發揮，玩家可選擇做醫護兵、突擊兵、偵察兵及工兵四個兵種，想在戰場上扮演邊個角色都有得揀，唔使毫無意識咁殺殺殺。唔講唔知，原來Jess（沈卓盈）想做前線嘅突擊兵，反而高海寧想匿在後方，如果兩人連線一齊玩，應該幾合拍。玩家仲可以在遊戲內設計出好個人化嘅戰鬥風格，遊戲內收錄了逾15,000種組件，可以慢慢發掘從而打造出唔同嘅玩法；武器方面有多達46種外，仲可以畀玩家改裝，總共可演變出二百幾種變化，玩極都唔會悶。

每幅地圖都各具特色，在山頭、叢林打游擊戰，或在城市打巷戰，感覺好唔同。	遊戲內可駕駛不同載具，坐在坦克內執行任務都幾爽。	兩位美女一人一段合作打《Battlefield Bad Company 2》，睇手勢似乎係Jess好打啲喎。

場景建築 任炸唔嬲

遊戲更收錄了共15款橫跨海、陸、空嘅載具，新加入嘅分別有可用於不同地形環境嘅All Terrain Vehicle（ATV），以及UH-60運輸直升機，前者速度高唔受地域嘅限制，可以快速深入戰場，至於UH-60更配備兩門軌道炮，既可以快速地將玩家空降到據點外，亦可以向地面掃射。先前講過《Bad Company》系列嘅特色係好着重破壞性，今集用上Destruction 2.0系統，一樣可以摧毀成棟建築物或戰場上嘅掩護物，唔係好似其他遊戲咁，只會熏黑外牆咁簡單，想點打都得。

用上升級版遊戲引擎，雪山上連飄雪都睇得見。	透過Destruction 2.0系統，真係可以摧毀整座建築物。	今集共收錄15種載具，橫跨海陸空三界。

四人組隊 爭取排名

今集更用上升級版嘅DICE Frostbite遊戲引擎去呈現戰場上嘅損毀情況，除了建築物中彈時嘅火光好有氣勢外，連天氣環境變化都做得好仔細，好似在雪山上進行任務時，會見到如實景般嘅飄雪情景。雖然單機都幾耐玩，不過想玩得過癮都係Online最爽。連線玩時用家要組成四人小隊出戰，可以跟對手互相廝殺或合作開啟特殊獎勵。遊戲共設有八張非常大型的多人地圖，每幅都各具特色，而且設有多達50級排名畀玩家慢慢煲，真係有排玩。

機檔案

類　　型： 射擊

開　　發： Digital Illusions / Electronic Arts

平　　台： Xbox 360、PS3

推出日期： 剛推出

售　　價： $318（Xbox 360）、$338（PS3）

查詢：2725 3338