新正頭雖然要講意頭，但今年機迷們注定都要「大開殺戒」。何解？由SEGA出品、Rebellion開發嘅射擊大作《Aliens vs. Predator》（下簡稱《AvP》）已正式登場，玩家可選揀以人類、異形及鐵血戰士三個身份去大肆殺戮。講真做人打異形冇乜新鮮感，所以做異形以快打慢折磨人類，又或者扮鐵血戰士隱身玩一爪封喉仲爽！

其實遊戲未正式推出前，網上已經有好多炒作消息，例如話澳洲方面起初覺得《AvP》內容太過暴力唔畀出版，最後又傾掂數，可以在不經刪剪下推出遊戲；又有傳聞話早前《AvP》嘅多人模式試玩版，因為等咗好耐都未齊人開局，結果搞到好多玩家放棄云云，雖然未知孰真孰假，但肯定已大收宣傳之效。

三大種族任揀

《AvP》電影本身Fans眾多，呢套遊戲版會唔會「雷聲大雨點小」？雖然開發公司Rebellion之前並未畀到玩家太大信心，不過小記試玩完後覺得應該可以令到玩家有所改觀。畫面表現流暢，廝殺場面嘅光影效果都有水準，不辱《AvP》之名。《AvP》故事發生在《Aliens》之後嘅三十年，地點轉到另一個殖民星球之上，而且仲可以畀玩家選擇做人類、異形或者鐵血戰士，在單機模式下每個種族都有自己嘅故事，做完人類，可以再扮成異形或鐵血戰士重新出擊，一個價錢就可以玩齊三大種族，都算抵玩。

連線互片最爽

筆者總覺得扮揸機關槍嘅殖民陸戰隊成員，同一般射擊遊戲玩法冇大分別，不如反串扮演鐵血戰士，可以隱身行動，並透過紅外線偵測裝備以及使用各式武器去戰鬥，視覺效果亦配合到應有嘅氣氛。而扮演異形時，更可以跟人類同鐵血戰士駁火，爬上天花板突襲，玩法特別，只要各位唔太介意自己變成外貌猙獰又核突嘅異形，都真係要親身試吓。不過最好玩嘅，始終都係玩多人連線模式，人類、異形同鐵血戰士同場互片，戰鬥組合咁自由，照計應該唔使等太耐就開到局。

《Aliens vs Predator》

類型：射擊

開發：Rebellion／SEGA

平台：Xbox 360、PS3

日期：已推出

售價：$358

查詢：2620 6667