內地網民早排搞咗個「中國十大魅力休閒旅遊湖泊」選舉，結果西湖居首，小記有位老友見到後就二話不說買咗張機票準備出發，然而這名路盲級別的朋友成日都會迷路，此行的確令人擔心。好彩Lenovo啱啱出咗部P707手機，不但預載了全中國三十一個地區地圖，仲提供巴士路線、旅遊景點等資訊，有咗佢，朋友一定識路返香港！

近年愈來愈多港人北上消費及工作，但為此而設的GPS手機卻寥寥可數。很多人以為可用Google Maps代替，但地圖要經網絡下載，上到內地未必收得到之餘，內容亦不夠詳細。Lenovo早於02年涉足手機市場，去年底正式進軍香港，首部作品便是看準港人北上需要的P707。

簡約拉絲金屬機身

Lenovo的個人電腦一向Sell平實專業，即使推出手機，風格依然不變。P707便採用了十分簡約嘅直身設計，機身正面是一塊3.2吋WQVGA屏幕，周圍則是鋅金屬機身，並經過拉絲處理，既美觀亦能增強保護性。雖然不是Smartphone，但它一樣可以手指觸控，可惜只是電阻式面板，靈敏度一般。為此，廠商在屏幕底加入Zoom Bar，設計跟HTC Touch Diamond 2所用的類似，都可用來縮放圖片及網頁，操控更得心應手。

機背是一整塊金屬電池蓋，設計相當簡約；而且鏡頭微微向內凹入，減低刮花機會。	手機主打導航功能，機身自然設有GPS熱鍵，一按即進行衞星定位。	最高支援16GB記憶卡，毋須拆電就更換到。
機身厚度得12.5mm，冇位放Stylus，篤芒惟有用跟機附送的電話掛飾代替。	屏幕底是Zoom Bar，左右捽便可放大相片。	首頁設計激似Samsung手機的TouchWiz介面，左邊提供時鐘、日曆等Widgets，拉出桌面便可使用。
國內手機向來創意爆燈，P707都有個「女性生理週期」計算器，邊日唔方便一睇就知。	除五筆、拼音輸入法外，還支援手寫中文，而且辨識率頗高。

中國地圖免費任用

P707最大賣點除內置GPS定位晶片外，還預載了多達三十一個內地省市的地圖圖檔，例如北京、上海及港澳等地，用家毋須支付額外的上網數據費用，也不用擔心因網絡接收不良而無法下載。地圖內容亦夠詳盡，例如建築物及景點提示分類便多達130種，手機會自動找出附近的酒店、餐廳及旅遊名勝，堪稱內地版《Lonely Planet》。地圖另一細心之處是港澳兩地的圖檔一律改用繁體中文顯示，即使唔去旅行，留在香港玩都啱用！

提供「智能周邊查詢」功能，可找出所在地附近的酒店、便利店等資料。

輸入起點及終點，系統便會建議不同行車路線，建議給中港司機使用。

詳盡交通路線提示

中國幅員廣闊，交通網絡亦四通八達，P707特別為此強化了交通搜尋能力。駕車時，只要輸入起點及終點，手機便會自動找出最短路徑、最低收費及高速優先等行車路線，揀選後，行駛途中又有語音及限速提示。即使唔揸車，它亦為用家提供公車（即巴士）路線提示，可詳細看到各分站及中轉站的位置，去旅行就唔使吓吓「打的」咁破費。另外，手機亦對應Geo Tagging，可把座標資料加到相片中，惟留意鏡頭未有支援自動對焦，不要對成像質素有太高期望。

機檔案

制　　式︰ GSM 900/1800

內置屏幕︰ 3.2吋26萬色TFT，240×400解像度

鏡　　頭︰ 320萬像素CMOS

記　憶　體︰ 內置50MB、支援microSDHC記憶卡（最高16GB）

對外連接︰ 藍芽2.0、USB 2.0、GPRS

通話時間︰ 240分鐘（GSM）

備用時間︰ 350小時（GSM）

體　　積︰ 110.4×54.1×12.5mm

重　　量︰ 121.5g

查詢︰2750 1128