次次都做正義超人，玩家都玩到厭啦，所以即將推出嘅《Biohazard：The Darkside Chronicles》，故事內容就係畀大家發掘一下眾多遊戲主角嘅陰暗面，聽落都幾有趣，而且遊戲玩法同兩年前嘅《Biohazard：The Umbrella Chronicles》一樣用Wiimote當手槍，對住畫面上嘅喪屍同變種生物開火，玩落勁爽！

遊戲叫得做《Chronicles》，玩家都估到係將經典場面重新包裝推出，好在唔係缺乏誠意嘅「炒冷飯」作品，例如今次就解釋到部分前幾集遊戲遺漏嘅故事內容，同埋描繪到角色間嘅陰暗面，角色變得立體咗，「死硬」Fans玩得更開心。

成排喪屍警察衝埋嚟，都咪話唔得人驚。	畀喪屍纏上，就要拚命狂搖Wiimote以求甩身。	按住B掣再搖Wiimote就可上彈，都要等一陣至可以再開火。

Wiimote變手槍

玩過《The Umbrella Chronicles》嘅玩家都應該識得點樣用Wiimote射喪屍，以準星瞄準喪屍或變種生物再開火就可以，最理想當然係能夠吓吓Headshot，賺埋Combo Bonus；唔好彩畀喪屍埋身時，就要好似玩緊PS3嘅《Biohazard 5》一樣，狂搖手掣（即Wiimote）甩身。雖然遊戲主線係一隻槍Game，不過當中都加插咗唔少難關，例如要在指定時間內同時住幾個按鈕或唔同嘅組合，失敗咗仲會隨時Game Over，都幾有挑戰性。

「Memory of a Lost City」畫面經常漆黑一片，好在準星位會有一點光，可當電筒使用。	想拎Combo Bonus就記住要打頭，打身嘅話要打幾槍先掂。	呢隻怪物嘅右手長到嚇親人。

重溫經典場景

今集遊戲嘅核心就係「Chronicles」模式，當中就包括咗三大場景，例如來自《Biohazard 2》嘅「Memory of a Lost City」，場面經常漆黑一片，都幾得人驚；而「Game of Oblivion」就係來自當年DC名作《Biohazard Code：Veronica》；至於以2002年南美做背景嘅「Operation Javier」更經過重新設計，但驟眼睇都幾似《Biohazard 5》嘅非洲舞台，在日光日白下打喪屍，確係另有一番風味。

嘩！呢張相真係幾嚇人。	女主角Claire	男主角Leon

拍檔互相照應

同《Biohazard 5》一樣，每個舞台上都係行「孖必」，即係由兩位角色合力打喪屍，不過唔同場合會有唔同配搭，好似Leon同Claire打「Memory of a Lost City」，另外Leon就會搭上Krauser玩「Operation Javier」，而Claire同Steve就會攜手執行「Game of Oblivion」，基本上Leon同Claire係「膽」，所以大家明白點解會搵佢哋兩位做遊戲封面啦。

行孖必除咗要保障自己安全外，都要照顧埋拍檔，當拍檔畀喪屍圍剿致死，一樣會Game Over，所以要不時為自己及同伴補血，同時今集都加入咗唔少新點子，例如可以自行組裝武器以及設有線上排行榜功能，唔再自閉。

行貨都有豪華版

日圓高水，令到好多日版Game價錢都被扯高，尤其係冇乜行貨嘅Wii，影響就更大。但係今次《Biohazard：The Darkside Chronicles》就有行貨返，而且仲跟日版一樣出埋收錄遊戲系列歌曲嘅Soundtrack同特典DVD嘅豪華版，分別賣$488同$568，比起Yen價其實都平上約兩成。

機檔案

類　　型：驚慄/射擊

開　　發：Cavia/Capcom

平　　台：Wii

推出日期：1月14日

售　　價：$488（普通版）

　　　　　$568（豪華版）

文：Brian