陳慧琳（Kelly）自誕下蝦餃仔劉昇後，有子萬事足，經常將兒子掛在口邊，日前更揚言想待2011年兔年生多個蝦餃女，湊成好字。Kelly心願如此，但玄學家認為她兔年再添男丁機會大啲喎！

於1972年9月13日出生的Kelly，生肖屬鼠，林炳南師傅說Kelly於虎年及兔年行雙官運，即明年及後年大有機會再生BB：「以虎年來說，Kelly會行食神運，即在2010年會有機會生女，至於兔年則行正雙官運，於2011年生仔的機會反而大一些。如果Kelly想生女的話，最好就現在懷孕，咁虎年年尾就大有機會生囡囡啦！」趕唔切喎，師傅！

仔女都咁好

雖然Kelly於虎年生女的機會較大，不過無論生仔或生女，對她或老公Alex都有好處，林師傅解釋：「Kelly如果生仔就會旺自己，但生女就旺老公，不過以Kelly的命格而言，生仔或生女都咁好，對其家庭運亦不俗。因為Kelly生於秋天，其八字以金較重，會喜歡有氣氛的家庭，所以生仔或生女都一樣咁開心。」

婚姻大圓滿

Kelly喜歡大家庭，而林師傅指她於43歲後，子女緣十分之厚，而從面相來看，其婚姻也相當如意。「Kelly相格清，即相貌清麗，沒有邪氣，表示她屬正氣女子，不會招惹狂風浪蝶，加上其八字金重，懂得權衡輕重對錯，所以婚姻美滿，而Kelly的子女緣亦很不錯。」林師傅指Kelly雖然是藝人，工作忙碌，但其命格顯示會懂得分配時間照顧孩子：「這可能與她命中喜歡溫暖家庭有關，所以其子女緣很豐厚。」Kelly最令人稱羨是生完蝦餃仔後，身形仲係咁Fit，真係生幾多個都無問題啦！