今年聖誕檔期擂台躉除咗有PS3嘅《Final Fantasy XIII》外，仲有呢款評價甚高嘅動作遊戲《Bayonetta》。早前日本權威遊戲雜誌《Famitus》將Xbox 360版《Bayonetta》評為四十分滿分，雖然坊間覺得近年《Famitsu》比較手鬆，未可盡信，不過只要Load入遊戲就會發覺呢隻以魔女打使徒嘅動作遊戲，除了招式瑰麗外，出超必時更會爆衫至幾近全裸，吸引力真係爆燈！
各位睇見遊戲既誇張又華麗嘅招式後，係咪覺得好熟口熟面呢？事實上《Bayonetta》就係由開發《Devil May Cry》嘅製作人神谷英樹所製作，不過《Bayonetta》就去得更盡；魔女主角Bayonetta平時會戴起呢兩年o架仔好Buy嘅眼鏡兼且大露背上場，到出超必時又只用長髮遮掩重要部位，明顯吸引過白髮紅褸嘅《DMC》型男主角Dante。
慢鏡模式瞄準攻擊
Dante可用雙槍都未算型，魔女Bayonetta連手腳都識開炮，有啲似早兩年套電影《索女．喪屍．機關槍》，認真誇張。論招式華麗程度，都係以《Bayonetta》較為出色，例如在二段跳躍時會張開蝴蝶翼，落地時雙腳更會放出多隻彩蝶；雙手雙腳又可裝上槍枝，一邊打半空翻，一邊向四方八面開火攻擊；仲可以發動到如Bullet Time嘅魔女時間（Witch Time），在短時間內變成慢動作模式，睇定再出招攻擊對手。由於遊戲速度感非常高，而且視點經常轉動，如果懂得善用魔女時間真係幾幫到手；不過要在咁高速的畫面中使出各式絕技都有一定難度，好在情急時亂按拳腳掣，都有機會出到絕招。
魔法刑具造型誇張
點解魔女出超必時會爆衫，原來Bayonetta的魔力來自頭髮，甚至連服裝都係由頭髮織成，出超必時就會使用服飾上的頭髮召喚魔力，所以會變成幾近全裸。另外，魔女亦能夠使出強勁嘅特殊攻擊技，如使出「鐵處女」（Iron Maiden）以及「斷頭台」（Guillotine）等刑具攻擊敵人，貫徹遊戲華麗誇張嘅特色。至於由使徒扮演的敵人角色，造型亦唔輸蝕，而且各關大佬都係以造型獨特兼且體形龐大見稱，不過玩家又唔使驚，大家可以先打跌大佬手上嘅武器，然後再執起來反擊，一於反客為主。早前日版水貨抵港後炒上五百幾元，今次行版就只賣三百幾，再送埋日版預訂特典CD，唔使捱貴Game仲有嘢送，聖誕假點可以唔煲番夠本呢？
機檔案
類 型：動作
開 發：Platinum Games
平 台：Xbox 360、PS3
推出日期：剛推出（十二月二十二日）
售 價：$358
查詢：2359 7998