《孖寶兄弟》可算是最受歡迎的任天堂遊戲，在Wii出過的紙板Mario、銀河冒險等隻隻都紅得起，但一個人玩始終有點悶，不如約齊班老友在全新《New Super Mario Bros. Wii》內，扮Mario、Luigi和Toad菇仔合力闖關，成班《孖寶》迷仲喺網上貼晒過關升呢秘技，真係快到你唔信。

筆者部Wii自「芒亨」後冰封咗成年，近來終於為《New Super Mario Bros. Wii》解封，準備操熟這隻四打Party Game迎聖誕，雖然故事以NDS版《孖寶》為基礎，但加入多人模式，可以齊齊頂龜之餘，仲可以爭食螺旋菇飛天、扮企鵝滑雪，甚至用體感操作機關，玩法既經典又夠新鮮。

Wii版雖然跟NDS同名，但就加入咗海洋、天空等八個全新版圖，關卡和玩法都唔同晒。	玩法和前幾代一樣，在地圖進入關卡後以橫向操作，不過改為支援四人合作模式。	每關大佬都係打龜，打完拎鎖匙過版救公主，畫面和故事係咪熟口熟面呢？

孖寶拖孖菇 Fing住過版

《孖寶》向來以Mario和Luigi兩兄弟做主角，今集首次玩四打，搵來Toad黃菇和藍菇幫拖，雖然主力用Wii Remote十字鍵加AB掣玩，但特殊動作和道具使用還是要靠體感操控，好似上下揮動手掣施展旋轉跳躍、左右傾斜手掣調節搖搖板角度等。最過癮是四人可合作過關，捉實隊友飛起又得，踩住隊友跳高亦得，還可變做泡泡等人帶你過版，打到一半想煮個麵食，都唔怕拉畫面拖死隊友。

好朋友Yoshi再次幫拖，騎住佢可用條脷吞食敵人外，仲可以喺空中踏步，延長騰空時間。	食咗螺旋菇後，左右搖手掣便可飛天食大金幣，儲齊三粒仲可睇隱藏片段。	以前就扮狐狸青蛙，今集變成企鵝在冰雪世界滑行，可撞開敵人和磚頭。

企鵝螺旋菇 飛天勁好用

單睇遊戲畫面雖然幾似NDS隻《New Super Mario Bros.》，但Wii版加入了海洋、天空、沙漠和冰雪等八個新設計的世界，仲有三套新裝助你過關和搵出隱藏寶物，當中嗰樣好似火球花嘅冰花，食咗可以射出冰彈將敵人冰封；企鵝則主要在冰雪版出現，可發射冰彈和在雪地上滑行，撞開磚頭和敵人；最常用的是螺旋菇，食咗後只要搖手掣便可飛高，飛上天搵食避難靠晒佢，感覺好用過以前條狐狸尾巴。

World 2-3金字塔梯級可靠邊位撞牆回彈踩龜拎無限1up。	水管頂龜年代的「POW磚」重現，在地下城過關食金幣完全冇難度。	網友自創的無限1up招數，捉隻龜掉入兩條水管間，然後靠踢水管慢慢拎1up。

無限金錢1up 隱藏升呢技

每集Mario都有隱藏秘道和升呢方法，今次都唔例外，仲打正旗號拍短片教你點玩Super Skills，只要在特殊關卡食到三粒大金幣，就可以睇電腦示範如何過秘道、拎1up等，經已有《孖寶》迷在YouTube上將秘技貼晒出來，仲加入埋自創屈機神技，好似在World 1-1捉隻飛天龜困在水管，靠踢水管拎無限1up；在World 2-3金字塔梯級，踩龜回彈無限1up等，睇到人眼凸。其實今集難度確實唔高，就算不用這些招數，單係去磨菇之家拎道具、玩下地圖小遊戲已經夠打。

機檔案

遊戲平台： Wii

發　行　商： 任天堂

遊戲類型： 冒險

遊戲人數： 1-4人

推出日期： 12月3日（日版）

售　　價： $348

查詢：2725 3338