真係多得佐治魯卡斯炮製《星戰前傳》（Star Wars：Episode），唔單只設計出共和國時代嘅白兵造型，仲有唔同部隊跟唔同配色，唔使審，玩具商梗係有幾多種色就出幾多款白兵，白兵迷冒住破產風險都要死跟。早前Sideshow推出嘅Imperial Shock Trooper又值唔值得追？老實講，造型真係造得神似，套甲又有舊化，加上「御林軍」嘅身份，喺一眾白兵之中零舍高幾班，真係唔買唔安樂。

先講少少Imperial Shock Trooper嘅背景資料。話說呢支白底紅間嘅白兵部隊，首先出現喺《星戰前傳Ⅲ》，專責保護共和國議會及政府設施，以及護送外交使節，雖然好少上前線，不過都身負重任，地位同大名鼎鼎嘅501th部隊睇齊；去到《前傳Ⅲ》臨尾嗰段，Imperial Shock Trooper就同其他白兵一樣，由共和國衞士變成帝國爪牙，Imperial Shock Trooper仲係直屬Emperor Palpatine嘅御林軍，亦有份護送被Obi-Wan斬剩右手嘅Anakin Skywalker入廠，變成Darth Vader。

素體嘅活動能力都算OK，屈膝持槍呢啲大動作都難唔倒佢。

全身唔少位置都做咗舊化上色，技巧未算頂級，不過比之前日本M記出嗰款好得多喇。

全身舊化 提升逼真度

相信Imperial Shock Trooper顯赫嘅特種兵身份，係唔少Fans入貨嘅原因之一。其實呢款Figure嘅造工，都好值得玩家入貨，首先白兵確係幾難做得靚嘅角色，事關線條簡單、用色又單調，不過Imperial Shock Trooper就有專用嘅紅色間紋，成個「星戰紅衞兵」咁款，個Look當堂Sharp晒。難得係今次Sideshow喺素體及盔甲嘅比例上都拿捏準確，加埋由頭到腳嘅舊化花痕，逼真度高咗好多。至於活動能力方面，無論係素體以及連身皮衣嘅柔軟度，都仲有改善空間，不過雙手揸槍呢啲有型動作依然做到，玩家唔使擔心，要擔心都係數數《前傳》仲有幾多精英部隊等住出Figure，你同我個銀包幾時先可以止血啦！

狂迷畀八十分

呢隻我反而未買，不過之前隻黃間Trooper（編者注：即係212th Attack Battalion：Utapau Clone Trooper，與Shock Trooper幾乎倒模一樣，只係盔甲上嘅花紋Pattern及顏色有分別）我就買咗，兩隻都造得幾好吖，我會畀八十分以上，尤其是套甲嘅大細，以及手腳比例都造得好好，好貼近電影設定。

查詢：2388 4677