坦白講，《Watchmen》呢套戲唔算好睇，片長三粒鐘，講多過打，搞到筆者呵欠連場，最精彩反而係頭三分鐘被人掟落街嘅「笑面俠」Comedian，形象鮮明、冷血成性，比其他主角搶眼得多。據聞佢喺漫畫都好受歡迎，最多武器又係佢，Hot Toys如今將佢Figure化，回響應該比之前嘅Silk Specture Ⅱ正面得多！

做番男人更擅長

女人唔易做，以女性Figure嚟講，HT嘅Silk Specture Ⅱ已經係上乘之作，但未滿意嘅Fans仍然大有人在，批評神似度不足。作為《Watchmen》第二炮，HT不容有失，揀咗輪廓分明得多嘅Comedian，配合Yulli雕工及JC. Hong上色，角色原貌即刻返晒嚟，近睇仲見到皺紋、鬚根、甚至牙縫位，眼罩又有立體感。仲記得電影中曾經回顧Comedian嘅青春歲月，若果送多個後生版頭像就更完美了！

Comedian鍾意擔雪茄，指甲變黃唔出奇，奇就奇在Figure都做到足，仲唔抵讚？	護膊及護肘都落足工夫，採用分件式處理，前者仲有磨花痕，又見心思。	皮鞋用料夠質感，把刀仔仲拎得到出嚟，唔係一件膠啤死得個樣。

面譜俠明年殺到

戲中Comedian一身SM緊身裝打扮，Figure嘅服飾自然跟到足，用咗橡膠縫製，帶有漆皮嘅反光感，亦保持關節嘅靈活性。為免上身關節外露，素體改用包膠Body，關節數目因此得番二十一個，雖然唔及一般Action Figure，但係揸槍擺甫士都考佢唔到。武器方面，電影出過嘅霰彈槍、榴彈炮、手槍及刀仔都統統有齊，仲有一條子彈帶，放到十六粒榴彈，換畀軍事Figure用都得。據知喺Comedian之後，另一人氣主角Rorschach（面譜俠）亦將於明年初登場，Fans要密切注意。

電影當中Comedian用過邊種武器，Figure都做足畀你。

由於「哈哈笑」版權並非電影公司所有，所以就算攞到電影授權，只能出黃襟章而非哈哈笑，美中不足。

零　售　價︰$980

預　訂　價︰$950

發售日期︰明年第一季

查詢︰2388 4677