組合Soler外表鬼鬼哋，口味竟然好地道，平日最愛去港式茶餐廳、大牌檔。大孖Julio說起奶茶、豉椒肉片炒河會眉飛色舞；細孖Dino說愛住唐樓，鍾情舊事舊物，裝修似懷舊冰室的「香港大牌檔」開正佢哋嗰瓣，兩個好兄弟仲爭食添！

講到食飯，Soler直言好味大於一切，但踏進經過精心布置的新餐廳時，也會即時望多兩眼，四圍參觀。

懷舊布置夠心思

「香港大牌檔」每層各有不同主題，像地下模仿舊式大牌檔，木枱櫈配紅色塑膠吊燈，氣氛輕鬆隨意，大門旁邊還有架人力車。沿樓梯直上一樓，會看到公屋常見通窿石牆，一端更放了經典的垃圾蟲雕塑，這層一派冰室格局，地下鋪滿紙皮石地磚，一邊卡位更特別裝成舊屋邨的窗景，可看到不同公司的招牌、晾衫竹及風箏等等，裏裏外外一樣的七十年代。

在澳門土生土長的Soler，原來對本港文化也略知一二，Julio說：「正式來香港發展前，我哋都經常過來玩，所以見過呢隻垃圾蟲同埋人力車。」Dino就表示：「澳門沒這種懷舊布置的餐廳，感覺幾得意。」

一入門口就見到這架人力車，感覺驚喜，加上紅A膠燈罩，感覺如像時光倒流。

懷舊冰室買少見少，難得有這間仿真度高的，可讓大家緬懷一下。

創新美食有驚喜

雖則名為大牌檔，卻不限於大牌檔貨色，奶茶咖啡、三文治、小菜及炒粉麵等一眾「台柱」外，還有泰、越、美式食物，大廚更創出一系列中西合璧的菜式，如燴牛尾撈粗麵、斑球燴扁意粉、煙三文魚檬粉配蟹子忌廉汁等。

大牌檔紅豆冰（左）$20泰式青檸梳打（右）$26紅豆軟綿甜膩，夾着面層刨冰，一食透心涼；選用泰國青檸、酸柑水及薄荷葉碎，酸香怡人，食飽飲好消滯。	斑球燴扁意粉 $58Dino讚意粉煮得Al Dente，絕不是港式意粉；斑球則以油泡方式烹調，保持嫩滑鮮味，屬中西合璧新創作。	大牌檔炒米粉 $36米粉連同豬肉鬆、豬腩仔肉、蝦肉、雞蛋、韭菜及芽菜等，以馬來西亞式秘製醬汁炒香，啖落微辣惹味，米粉乾身少油，難得！
懷舊碗仔翅 $14以雞湯煨煮的木耳、粉絲、肉絲、冬菇絲及筍絲等，分外入味，加上湯羹濃稠得宜，平凡中見心思。

講咗咁耐，係時候入正題─試食。Julio說：「如果想知間餐廳得唔得，我會叫招牌菜，或自己經常食的，一試就知真章。」見他低頭密密食，就知這大牌檔水準不錯。而Dino則點名大讚三杯雞、大牌檔炒米粉乾身唔多油......唔好掛住講，Julio就快清晒枱喇！

垃圾蟲睇場

香港「七十代」一定見過呢隻綠色垃圾蟲，當年政府為推行清潔香港運動而做，曾在中環放置大型垃圾蟲作宣傳，形象深入民心，直至九十年代才改由清潔龍家族接棒。

查詢：2838 3318