放大圖片

《Assassin's Creed II》畀錢請人做幫兇

本文重點

爬牆匿埋避追捕
成日搞事壞名聲
機檔案

由Ubisoft炮製的第二集《Assassin's Creed II》都幾落本，支線故事豐富兼且玩法有趣，例如可以接Job同打低敵人後「搜身」搵錢，仲可以畀錢請打手、小偷同交際花幫手玩裏應外合，連達文西都會幫主角研製武器同飛行器，都咪話唔過癮。

點解會有達文西出現？因為今集遊戲背景設定在十五世紀嘅意大利，要在佛羅倫斯同威尼斯展開刺殺行動，而達文西就係主角父親嘅好朋友，所以順理成章幫吓世姪完成任務。

爬牆匿埋避追捕

雖然話上集十二世紀嘅耶路撒冷都已做到好逼真，不過睇埋今集嘅意大利實景畫面，就知道又進步咗唔少，好似天色會因應時間而變化，得閒坐喺屋頂睇日落都幾好Feel，加上毋須再成日穿梭古今兩個時空，唔使轉到頭暈。玩家在執行刺客行動時，當然要盡可能低調，而且街頭滿布敵人，行快幾步都會惹人注意，隨時畀守衞捉走，不過大家都可以善用街上載滿碎葉嘅手推車，或者街邊嘅長櫈，搵位匿埋避吓風頭。唔想煩嘅話又可以爬上樓，在屋頂上跳來跳去掩人耳目，但萬一失足跌落嚟都真係幾傷，所以都係小心啲好。

玩家可以選擇游水過河，或者推船夫落河自己撐船。	遊戲引入時間系統，天色會隨時間變化，大家睇吓佛羅倫斯夜景都幾靚。	逃避敵人嘅其中一個方法就係坐在長櫈上垂下頭，見到主角個樣突然灰晒，好搞笑。
主角識得飛簷走壁，要爬牆同在屋頂間穿插易過食生菜。

成日搞事壞名聲

玩家刺殺目標後，一樣可以好似上集咁，專登撞跌途人嘅物件，又或者無端白事打人製造混亂，令自己有機會逃走，不過成日搞事嘅話，就會增加玩家嘅壞名聲，唔單止敵人會對你嘅行動更加警覺，就連平民百姓都唔會再幫你，所以唔好濫用。不過一個人單打獨鬥，點都唔及畀錢請人幫手咁過癮，今集可以請來交際花引誘守衞，或者僱用小偷幫手協助玩家完成任務，玩法更有趣，而且遊戲中亦多咗唔少新武器，斧頭、毒針、狼牙棒等唔在講，最型係由達文西設計嘅飛行器，可以在城市上滑翔，隨時攻其不備。

當壞名聲太高時，就會見到周圍貼有主角樣貌嘅通緝令，每撕一張就可以逐步將壞名聲減低。	今集打低敵人後可以搜身搵錢，不過士兵、守衞身上都係得幾蚊，無乜油水。	畀得起錢嘅話，不妨搵交際花去引誘守衞，潛入建築物時就冇咁易畀人發現。
達文西係主角父親的朋友，遊戲中更會為主角製作飛行器。	無論係Xbox 360或PS3都會出連Figure嘅珍藏版，白色Figure明顯型啲，但就送少兩幅地圖。