「哈囉喂」就到，雖然香港的小朋友唔興逐家逐戶拍門大嗌「Trick or Treat」，但節日氣氛卻非常濃厚，不少人更會扮鬼扮馬開派對、去主題樂園撞鬼等。歌手麥家瑜（Keeva）話以前會自製曲奇餅，同朋友分享，今年萬聖節佢決定「升呢」學整鬼眼蛋糕，難得有烹飪導師Kannis睇實，雖然過程論論盡盡，但都叫做完成搞鬼任務。

這個外表斯文，內裏Rock爆的女生，對烹飪其實好有興趣，但無奈自小被家人禁止踏足廚房，怕她發生意外。「但我都試過偷偷整芝士蛋糕畀爸爸食，仲有曲奇餅、蛋撻。最好笑係有次整薑餅，點知落錯咗沙薑粉……」Keeva大爆入廚瘀事。

加國過節 氣氛濃厚

「以前在加拿大過節，好有氣氛o架！商場有特別布置，小朋友又會拍門攞糖，人人都會打扮過至出街。我就試過扮白面女鬼，塗上紅紅胭脂，又扮流血，都幾好笑。」Keeva笑說兩地的文化差異。「不過，我自己就幾鍾意呢個節日，會整曲奇餅同朋友分享。今日第一次學整Halloween蛋糕，原來無想像中咁難，可以考慮整番個應節。」她續說。

麥家瑜近況 剛推出首張個人大碟《Keeva Mak》，Rock味甚濃。最近還在苦練結他，並得Mr.結他手MJ指導。

今期師傅： Kannis Yeung（楊綺雯）曾任廚師十年，現為食譜作者及烹飪班導師，推出食譜超過二十本，最新傑作是《懶人甜品》。

作為導師的Kannis則表示：「呢款蛋糕唔算好難做，但大家要留意打蛋白、拌勻材料時的手勢及力度，如果唔係個蛋糕會塌身。以新手嚟講，Keeva算做得唔錯，我畀九十分啦！」

新手搞搞震

Keeva手快快打蛋，搞到蛋黃、蛋殼一齊掉落碗中。	雞蛋敲開兩半後，小心將蛋黃留在蛋殼內，蛋白則流進碗內。	使用電動拂蛋器時，千祈咪好似Keeva咁，左Fing右Fing。
應該一隻手固定碗邊，另一隻執緊拂蛋器將蛋白打至挺身。	拌勻各式材料時，不要將攪拌器直立放，攪拌效果不理想。	應將攪拌器橫放，然後順時針方向將所有材料拌勻。

鬼眼蛋糕（6吋直徑）

材料：

牛油 75克　

糖 70克

雞蛋（蛋白、蛋黃分開） 3隻

朱古力針 75克　

果仁碎（可選杏仁、核桃或南瓜子等） 75克　

麵粉 25克

可可粉 3/4湯匙

鬼眼及裝飾材料：（罐頭荔枝、黑橄欖、適量紅色食用色素及黑芝麻醬）　

做法：

1. 用電動拂蛋器高速將蛋白打起，將糖（35克）分三次加入蛋白內，打至挺身備用。

2. 混合牛油及糖（35克），用電動拂蛋器高速打起。加入蛋黃、朱古力針及果仁碎拌勻。

3. 加入一半打起的蛋白拌勻。慢慢篩入麵粉及可可粉，拌勻，再下另外一半蛋白。

4. 預熱焗爐至180℃；6吋模具內鋪上焗爐紙，倒入蛋糕材料，焗約30至35分鐘。

5. 出爐後放涼、冷凍，表層塗上黑芝麻醬及放上鬼眼即成。

自製陰森鬼眼

萬聖節食物要形神俱似，先至夠氣氛，各款應景裝飾品因此大派用場。其中「鬼眼」簡單易做，將黑水欖釀入去核荔枝內，再加幾滴紅色食物色素，就可營造恐怖流血效果。

做Cake好幫手

位於油麻地的I Love Cake，以一身新派、光猛裝修在老店群中突圍，出售多款烘焙用品及食材，種類豐富，令人花多眼亂。趁哈囉喂來臨，店子亦有售得意應節曲奇餅模，方便大家在家炮製曲奇與眾同樂。

不銹鋼蝙蝠、南瓜及鬼鬼吸模 各 $49起

膠製南瓜餅模 $29

小貼士：

1. 牛油先置於室溫解凍，會較容易拌勻。

2. 用來打蛋白的碗、拂蛋器，使用前宜先以熱水灼過，肯定沒有沾油或水，否則蛋白不能打起。

3.所有材料不宜過分攪拌，否則會出水，影響蛋糕質感。

4.蛋白打好後，嘗試將碗倒轉，蛋白不掉下來便為之「挺身」。

查詢：2671 2671

文：P.Yeung　攝：Stella　場地及食材提供：I Love Cake