玩Home Theatre除咗講求畫質外，當然要配合埋音響器材，先至係最佳享受。一連四日喺會展舉行嘅Sony Festival感謝祭，昨天剛剛開幕，特別將多套在外地影音展展出的產品移師會場，包括首次在香港展出的Sountina玻璃管喇叭！

跟平時以散貨為主嘅大型展覽會唔同，今年Sony Festival就全力展示各款影音、相機、手機產品，部分更係第四季先正式推出的不日新作，率先畀大家體驗一下最新嘅數碼科技。除此之外，Sony亦會舉辦陳列品拍賣活動，就算「筆直」唔多的用家都有機會買到心頭好。

原音喇叭 十萬有找

影音產品一向屬高消費，好似今次展出的高級投影機VPL-VW85就索價超過五萬元。不過講到全場最特別的產品，一定非Sountina NSA-PF1喇叭莫屬，外形似足一支玻璃柱，柱身還會不時透出色光，放在家中已經是一件別致的擺設。唔講唔知，原來Sountina這個名稱是由「Sound」和「Fountain」組合而成，而柱身玻璃部分為高音單元，中間及底部則為中音及低音單元，聲音會透過玻璃柱平均擴散，離遠聽都無損細膩音色！

中音及低音單元收藏在較低位置，行近勁有Base感。	中間的色光會隨時轉變，非常特別。	$99,880

足球場試《FIFA 10》

Sony作為明年世界盃贊助商之一，所以亦趁機喺會場內整番個足球場宣傳，裏面設有大量與足球相關的主題，好似可以即場試玩剛推出嘅《FIFA 10》PS3新Game，而且現場仲有個1：1人形足球機，連早兩日先正式首賣嘅PSPgo都可以任試，各位機迷又點可以錯過。

PlayStation攤位有得試玩《FIFA 10》同PSPgo，難怪人頭湧湧。

會場中間設有一個足球場，成個感謝祭的主要活動都會在這裏舉行。

年度機王現真身

Sony Ericsson在早前的電訊展上公布了幾部新機，分別係Satio、Aino同Yari，型號名稱都特別過人。Satio係首部備有千二萬像素鏡頭的S60 5.0手機，外形又靚仔，相信會有好多用家留意；而Aino就玩PS3互通，可以直接傳輸多媒體檔案；至於Yari則以體感遊戲作主打，勝在售價夠平，得閒搵佢幫手做運動就最啱。

Satio有幾種顏色，又可以影靚相，係最先曝光嘅千二萬像素影相手機。

Aino可利用機座接駁PS3，超有型。

現場花絮

車震試DV 可以在震動車廂中測試攝錄機的防手震功能。	高清真人騷 唔明咩叫高清畫質？現場就有一個真人示範，你又估唔估到邊個至係真？	攝影及攝錄展區布置成熱帶雨林Feel。

必睇新品

高檔投影 VPL-VW85備有Sony獨家的Advanced Iris 3光圈，而且用上SXRD Panel，一望就知係高檔產品。比起早前推出的型號，VW85的對比度增加至120,000:1，加埋自家x.v.Colour及MotionFlow技術，睇動作片都唔會有殘影！售價：$54,600（需預訂）	抵玩全高清 HW15入手價較平，不過都有BRAVIA Engine 2訊號處理功能，加上支援全高清解像度及60,000:1對比，算幾抵玩。售價：$22,000	Blu-ray新貴 最新發表的BDP-S765是場內Blu-ray播放機新貴，配備高清真實強化器及Super Bit Mapping影像強化技術，睇藍光碟時，影像更加銳利流暢。售價：$4,280
即時印相 數碼相架之前都係玩吓Design、尺寸，最多玩埋屏幕像素，不過呢部DPP-F700竟然內置即時打印相片技術，四十五秒就印出靚相，仲可防指紋、防水、防陽光。售價：$1,790（需預訂）

展覽詳情

時間：十月三、四日（11am-8pm）十月五日（10am-2pm）

地點：灣仔會議展覽中心新翼Hall 1A

費用：全免

文：Angie　攝：Stella、Angie