去年《爆粗Band友》旋風襲港，松山研一（即《死亡筆記》的L）飾演的牛蒡男，誤打誤撞成為萬人景仰的粗口歌神，夠爆、搞笑、有共鳴。現實中外表有幾分牛蒡味的漫畫原作若杉公德老師，原來同樣似足魔王咁搞嘢，唔擺甫士、唔準Close Up、唔畀閃燈，問佢一秒唱到幾多次FXXK？「唔答！」
寫作由憤怒開始
筆者身為DMC（爆粗樂隊Detroit Metal City）歌迷，當然唔會為Krauser二世魔王的冷酷而感到失望，相反傾談時更能領會若杉老師的心路歷程。大學畢業做過居酒屋兼職，又做過五年助理的若杉老師，對現實充滿憤怒，又對理想抱有期望，於是開始構思一部融入音樂理想和搞笑元素的漫畫，由於鍾意聽歌，仲係日本The Blue Heart樂隊的忠心Fans，老師發覺重金屬和民歌類型差別較大，由此成為《爆粗Band友》雛型。
笑料雙面人夠爆
《爆粗Band友》漫畫銷量破四百萬本，唔係囂張，老師話未推出前已知道係一部好漫畫，不過每期「度橋」最難之處就係搵笑位，身為處男卻被誤會成強姦殺人犯，仲要強姦東京鐵塔，不文抵死內容連日本天后木村Kaela、人氣樂隊Puffy等明星都被迷倒。若杉老師認為Krauser二世外表夠癲、笑料夠出位，才能明確將意念表達出來，但實際根岸內心係叫人唔可以咁樣做，反差夠大才可令讀者會心微笑。
探討根岸內心世界
Q：你覺得漫畫中邊個角色最能凸顯到老師的性格？
A：根岸（牛蒡男）最能反映到我的性格，但係如果有得揀，梗係想做用煙頭辣人的社長。
Q：究竟老師似變身前的根岸還是變身後的Krauser二世呢？
A：音樂上兩邊都差唔多鍾意，但感情上比較偏向魔王「諗邪惡嘢多過做」。
Q：爆粗電影和DVD歌曲用番晒漫畫歌詞，係咪之前諗定出碟？
A：畫漫畫時冇諗過會做成Sound Track（圖一），將歌詞變成真正歌曲要多謝幕後人員。
Q：爆粗漫畫熱爆全城，幾時再有新作推出?
A：新作《摔角少年牛蒡男》（圖二）是我做助理時畫的，將來就想畫一些關於學術的搞笑漫畫。