$4,690

法式Focal XS絕頂靚聲

本文重點

設計似足iMac
人聲表現突出
機檔案

形勢大好的iPod/iPhone喇叭，引得愈來愈多有名嘅音響廠商玩埋一份，新手仲包括一直玩開Hi-End喇叭嘅法國品牌Focal。Focal係少有一手包辦喇叭單元、分音器、音箱設計同製造嘅廠商，其頂級Utopia系列喇叭在Hi-End市場一直好有名，所以今次呢套2.1聲道Focal XS Multimedia Sound System，就算未聽聲都已畀到人相當大嘅信心，再睇埋似足iMac嘅外形設計，忠實Mac友又點會唔心動！

設計似足iMac

其實只要睇見Focal XS Multimedia Sound System的外形，都應該會畀佢吸引住。兩個衞星喇叭用上銀腳配鋼琴黑面底座設計，從側面睇更好有iMac嘅影子；由於呢套音響組合都設有USB介面可連接電腦使用，配埋iMac就真係一絕。Focal XS更少有地在喇叭底座上加入Sync鍵，只要放上iPhone或iPod再按Sync鍵，便可在充電時同步資料，非常實用。另一似足iMac嘅設計，就係卡片形嘅遙控器附有磁力，可以黐在銀色腳架上。

Focal XS衞星喇叭設計跟新iMac（左）如出一轍。

超低音喇叭內已內置三聲道擴音器，低音相當實淨。

另一好有iMac神髓嘅設計，就係可以將卡片形遙控器以磁力黐在喇叭的銀色腳架上。

人聲表現突出

在配合iMac使用時，Focal XS仲可以應用到一套名為Visual and Sound Coincidence的優化技術，利用枱面同顯示屏的表面反射，令聲音定位更準確。Focal XS衞星喇叭採用二路設計，配備Mylar聚脂薄膜高音單元以及紙膜中低音單元，而超低音喇叭則採用低音反射式設計，內置了三聲道擴音器，延伸力高，可下潛至39Hz超低音。而Focal XS調音基準更係用上Focal自家著名嘅專業鑑聽級喇叭Solo6，質素可想而知；試聽時人聲表現突出，用上法蘭西女聲Keren Ann的大碟作測試，音質表現細膩，層次豐富，啱晒對音響有要求嘅Mac友。