父親節，大家嚷着要送紅酒、雪茄、皮包……其實子女生性孝順，對父母親來說已是最佳的禮物。不如今日就送出寶貴時間陪伴父親，像前香港隊單車代表成員何兆麟（Alan）跟他爸爸一樣，齊齊下廚切磋廚藝，就算高下立見，爸爸都笑逐顏開！

小時候，Alan家多由何爸爸掌廚，後來他跟兩位兄弟分別遷出獨立生活，雖然經常會跟爸爸飯敍，但幾位男士懶得煮，大多館子用膳。今個父親節，Alan兩父子一時興起準備煮番兩味慶祝，可惜茫無頭緒，那就請名廚高榮新師傅為他們度身創作窩心菜式吧！

簡易健康炒雜菜

何爸爸平日在大陸上班，舟車勞頓應酬多，回家吃飯好應該吃得清淡點，同時補充多方面營養素。高師傅就教Alan選用健康的蔬菜組合，包括維他命C及纖維豐富的西蘭花及椰菜、包含胡蘿蔔素的甘筍及蛋白質豐富的日本菇菌，配合高師傅用上老雞、火腿等材料熬製的自家品牌「頂湯皇」，炮製出不含味精又夠鮮味的菜式，做法更連一向只會做簡單西菜的Alan都應付自如，聲言要讓家中廚房話事人太太試試這首道家常菜。

西蘭花、椰菜及甘筍分別切件。	用鍋燒滾水，加入少許生油、鹽及糖，將各菜類放入滾水中略煮，撈起瀝乾水備用。	燒紅鑊後下油，將雜菜下鑊炒，灒少許酒後，加入適量頂湯皇、頭抽、鹽及糖調味，炒至全熟後用生粉水埋芡便成。

日式炒雜菜

材料

椰菜　 500克

西蘭花　 150克

甘筍　 100克

日本鮮滑子菇 一包

頂湯皇　 適量

頭抽　 適量

鹽、糖、紹酒 適量

高師傅小貼士

西蘭花和甘筍需煮至軟身，較易熟的椰菜及鮮滑子菇則煮至六成熟左右。

惹味開胃煮大蝦

Alan小時候試過何爸爸手藝，最懷念開胃又惹味的番茄煮紅衫魚。高師傅知道何爸爸難得再為兒仔親製美食，就教他用其自家以天然香芋粉、植物油、蝦米及咖喱粉等秘製的油咖喱醬來炮製咖喱蝦，不含味精但惹味非常，甫下鑊已經一屋咖喱香。男生最喜歡香口惹味的菜式，此菜開胃之餘，亦讓於年前榮升爸爸的Alan開眼界，多學一招半式氹爹哋開心。

馬來咖喱蝦	剪去蝦鬚後，放入開水中煮至三成熟，倒出隔去水分。	於鑊中下油後，放入大蝦炸熟後撈起備用。加入適量牛油和油咖喱醬爆香。
加入炸好的大蝦略炒，灒適量酒及水後，放頂湯皇、鹽及糖調味，炒至入味後，加入適量椰漿和花奶。	加入切角的洋葱、青椒及紅椒後以生粉水推成芡汁，即可上碟。	爹哋，加餸呀！

馬來咖喱蝦

材料

新鮮大蝦 500克

洋葱 半個

青椒 1個

紅椒 1隻

油咖喱醬 25克

頂湯皇 20克

鹽 5克

糖 10克

牛油、紹酒、

椰漿、花奶 適量

高師傅小貼士

炸蝦時鑊中油溫燒至80℃度左右最佳。

識做！

拍攝此專題時，即使何爸爸技術生疏、Alan雞手鴨腳，一家人還是愉快分享美食。小記自問甚具下廚天分（其實即毫無實戰經驗……），但卻從未為家人下廚，頓時感到有點慚愧。老竇，這個父親節，我知點做喇！

何兆麟小檔案

曾獲二○○一年全運會男子四十公里個人記分賽金牌，及二○○二年釜山亞運會銅牌，退役後加入教練行列，成為香港單車聯會一級教練及三項鐵人隊單車教練，積極推廣全民參與單車運動。