如果你鍾意打格鬥Game，都應該試過當遊戲主角遇上深仇大恨嘅宿敵，事必先口角一番，講到無彎轉準備開拖時就彈出一句—問答無用，跟住至大打出手。原來「問答無用」係日文漢字，可以解做「唔使多講」，或「不得爭論」。當你已經準備開拖，對方仲係口水多過茶、死雞撐飯蓋時，就可以大喝一句「問答無用」，然後想出拳定出腳，悉隨尊便啦！