仲有一個禮拜，《變形金剛：狂派再起》（簡稱《變2》）就有得睇，上網訂IMAX已經爆到七月，網友睇完Trailer都讚「Megan Fox好索」、「新角色好型」，不過談論得最多，其實係四處破壞嘅大怪物，佢就係初代卡通（G1）已經登場嘅建造派破壞者，係少數由地盤車合體而成嘅大反派，今次玩具登場一定撐硬！

六合一經典再現

電影中嘅合體建造派成十幾層樓咁高，變成玩具版都好有分量，合體後雙手仲識360度轉同埋向前屈，雙腳亦企得穩陣擺甫士，算收貨啦！唯獨係每部地盤車識合體，但係唔識獨立變做機械人，有啲美中不足，好彩合體後頭部學足電影情節識得開合，按機關掣，雙眼同個口又會閃出綠光，仲要識得發聲講對白，夠晒傳神。

按住心口嘅機關掣，頭部就會仰起兼開口，發聲之餘，仲有綠光閃閃吓。	原著G1嘅建造派，合體後變成綠色巨人，同《變2》嘅大怪獸造型真係好大分別。	六合一解構
左手：吊車	頭部：田螺車	右手：鏟車
左腳：推土車	身軀：單臂鏟泥車	右腳：泥頭車

人車拍檔最過癮

作為第二波玩具主力成員，除咗建造派，仲有新系列Human Alliance，顧名思義，就係有埋人類主角Figure，打頭陣係飾演阿Sam嘅沙拉保夫拍住新版大黃蜂出Boxset。最過癮係兩吋半嘅Microman SAM坐得入車廂之餘，當大黃蜂變成機械人後，仲可以坐喺佢嘅手臂及背脊，比例啱啱好。預計稍後仲有女主角美瑾登場，筆者建議整埋導演米高比爾仲過癮。

大黃蜂與阿森（Bumblebee with Sam）　$329.9	阿Sam坐得落車廂，夠過癮。	兩吋半嘅阿Sam似足Microman人仔，頭部、手腳及腰部都可以郁。

拖頭版文哥 旺角現身

電影未上，「文哥」柯柏文已經現身香港。事關依家旺角新世紀廣場就有《變2》嘅大型展覽及專賣會，除咗展示二十五年嚟變形金剛經典角色及新款玩具，仲有長四米、高兩米嘅巨型柯柏文貨櫃車壓陣，畀Fans合照留念，傳聞稍後仲有由外國運嚟嘅1:1二十呎高變形金剛，大家拭目以待。而且喺專賣會現場購買電影新版變形金剛產品滿$150，可以免費換領由香港粉絲設計嘅摺紙柯柏文模型，只此一家，喺其他國家搵唔到架！

喺專賣會買滿$150，就可以換領摺紙版柯柏文，數量有限，送完即止。

現場有四米長嘅巨型柯柏文拖頭同你合照。

活動小資料

名　　　稱：《變形金剛：狂派再起》展覽及專賣會

日　　　期：即日至本月二十八日

展覽區時間：10:00am-10:00pm

專賣區時間：12:00noon-9:00pm（周一至周五）

11:00am-10:00pm（周六及周日）

地　　　點：旺角新世紀廣場一樓星際廳

查詢：2302 1221