13/06/2009

播放本新聞相關短片

無線eye2 八吋大芒流動睇波

身為球迷,最艱難的時刻是球賽途中人有三急,究竟睇波好定解決好,忍得多都唔係好事。PCCW新出的「eye2」家居無線多媒睇服務就解決晒以上問題,透過一台擁有八吋大芒的流動播放器,便能隔空接收逾一百七十條nowTV頻道,以後行到家中任何一個角落都可繼續睇波,夠晒Free!

早於○七年,PCCW已推出第一代「eye多媒睇服務」,當時透過一個附有4.3吋屏幕的IP Phone,便能打電話、睇電視、聽歌甚至查閱八達通結餘;只可惜該電話為有線設計,用戶要行到屏幕面前睇資訊,唔夠方便。有見及此,新一代eye2的硬件便來個大躍進,電話變成一台Portable Media Center(PMC)裝置,除內置了NOW電視解碼器,還集八吋輕觸式16:9屏幕、3W立體聲揚聲器於一身。最重要是對應Wi-Fi,用戶在家裏四圍走都能接收寬頻電視及使用互動服務,令電話變身成為家居的流動娛樂中心。

睇電視 唔使爭

在eye2未推出前,PCCW進行了一項調查,發現超過五成現有eye用戶,均有收看nowTV,因此這一代特別強化相關服務;例如以往只能觀看十一個電視頻道,但現在只需繳付$188基本月費,就能觀看十九個免費頻道,當中包括︰Bloomberg、CCTV-9、NOW財經及直播台,用戶更可依目前nowTV的收費表,訂購更多不同頻道。此外,若用戶是nowTV的現有客戶,只要每月畀多$70,便可把主機變成第二個解碼器,將已選購的頻道放在eye2上欣賞,將來就算波馬同日播放,都唔使再同老竇爭電視。

聽任白 學煮餸

eye2另一強化是moov音樂播放部分,以前只能聽歌,如今卻可任聽任睇超過十三萬個音樂內容,包括音樂台、大碟、演唱會、MV及moov Live等;更備有經典粵曲,老人家毋須使用複雜的音響器材,就能重溫任白名曲。說到老人家,上代極受歡迎的「烹飪菜譜」亦保留下來,提供廣東話、菲律賓、印尼及英語四種語言的話音版食譜及黃淑儀入廚樂,老媽子只要把eye2拿入廚房就能邊睇邊煮,保證有好嘢食。

插手指 播短片

互動服務是eye2另一亮點,主要內容有「生活百科」及「益智樂園」兩部分。前者可查閱日常及即時資訊,例如新聞、天氣、股票、賽馬、足球及六合彩;後者則專供小朋友學習使用,內容包括迪士尼童話細聽、兒歌、IQ題及朗文互動教學等等。除此之外,eye2還備有PCCW服務專區,可用此查閱帳單、搜尋黃頁或選購電影戲票及劃位。為了擴闊應用層面,eye2主機還可當作一般PMP使用,只要插入USB手指,即可讀取內裏的相片、電影及音樂,戶內戶外都用到!

體育頻道要另購

呢排eye2個廣告日播夜播,加上功能嶄新,聽落幾吸引。但月費$188唔算平,而且最多人睇的now Sports要另外訂購,吸引力無疑打了折扣。另外,現有nowTV用戶需加錢才能睇番所有頻道,其實係畀錢買多個解碼器,划算與否見仁見智。

查詢︰2888 1888

Gilbert