如果大家以為今年洛杉磯舉行嘅E3 Expo遊戲展冇乜睇頭，咁諗就錯晒啦，原來幾間大廠都有備而來，其中Microsoft就發布咗任跳任打嘅《Project Natal》系統，利用外置鏡頭就可玩3D操控，仲一如既往咁請來多位巨星為新作撐場，唔信？！即時去片話畀大家知。
《Project Natal》大玩立體體感
《Project Natal》其實都係駁鏡頭玩體感遊戲嘅概念，不過技術就再先進啲，首先用上兩組鏡頭記錄畫面，再經由內部處理變成3D數據，所以能玩到立體嘅體感遊戲，十足十科幻電影嘅產物，難怪史提芬史匹堡都走出場話未來嘅遊戲應該係咁玩！更神奇係系統仲可以認埋玩家嘅面部表情以及聲線嚟畀反應，睇見現場所做嘅示範，打人、打波、踢波樣樣都好逼真，至於幾時會推出，預計明年或二○一一年就有得玩。
《The Beatles：Rock Band》獨家下載金曲
遊戲設計雖然跟外國勁受歡迎嘅《Guitar Hero》好相似，但係《The Beatles：Rock Band》勁到拎晒披頭四版權，發布會上更有Paul McCartney、Ringo Starr同John Lennon、George Harrison遺孀撐場，夠晒畀面。雖然遊戲唔係Xbox 360獨佔作品，但係披頭四名曲《All you need is love》就只可經由Xbox Live獨家下載。
《Halo 3：ODST》前傳新玩法
今年未有《Halo 4》消息，但就出多隻《Halo 3》前傳《Halo 3：ODST》，當中收錄了正傳前兩周所發生嘅故事；另外亦加多兩幅新《Halo 3》多人地圖，至少可以為各《Halo》Fans止止癮。
《Forza Motorsport 3》撞車夠逼真
Xbox 360年度重頭戲應該落在《Forza Motorsport 3》身上，同以往一樣都係賣真實感，今集更收錄咗五十間車廠共四百架靚車，再有逾一百條真實街道及賽道，牌面已夠照，最正係撞車時嘅物理反應更逼真，奉勸大家一句「小心駕駛」。
《MGS：Rising》小島Xbox首發
發布會上另一震撼消息係《MGS》之父小島秀夫上台公布會首度在Xbox 360上推出《Metal Gear Solid：Rising》，遊戲玩咩仍然係個謎，現場只播放咗一段介紹主角雷電出場嘅短片，但都叫機迷熱切期待。