Fundman睇市：旺旺可候低吸納

滬綜指連跌兩日後，昨日翻生企住3,000點收市，炒上原因係社保基金及國家外匯局入市，相比國家隊已用萬幾億入市，社保基金攞100億出嚟只係象徵意義，但A股亦不能用常理去解釋。

昨日話港股受油價和滬綜指兩大阻力制約，雖然油價未有起色，亦很大程度觀望油國下月開會結果，但美股近期漸告擺脫油價引力，其實油價只要唔跌穿30美元搞到銀行壞帳，低油價始終是經濟的助力，所以油價保持在30至40美元之間最好。

內地通脹威脅增

不過，耶倫突然話驚通脹未達標以及中國經濟差，所以會「審慎」加息喎，等於間接否定四月會議加息機會。美國去年底首次加息時，聯儲局尚稱對通脹中線達標有信心，依家商品價格經已回升，美國核心通脹亦見升逾2%，而中國經濟放緩更是由過去式、現在式以至將來式的持續進行，耶倫女士無非冇膽加息而搵藉口。

講開通脹，中國舊年驚緊通縮，但話咁快又驚通脹，甚至滯脹，皆因豬價和菜價升幅驚人。食品價格上升，自然搵食品股落鑊兼炒落後，昨日蒙牛（02319）、康師傅（00322）、旺旺（00151）、萬洲（00288）以及統一（00220）等全部升幅強勁，但睇番成績表，上述五股舊年盈利分別為+1%、-36%、-12.6%、+3%及+192%，除咗旺旺因一四年基數低而見巨大升幅之外，其他睇業績已知舊年經營情況認真麻麻。

食品股曾幾何時係投資界天之驕子，皆因食品及飲品係必需品，穩陣之餘並具增長概念。不過，原來經濟不景對食品股亦有重大影響，最主要是各間公司都希望爭奪市場，競爭一直相當激烈，碰上經濟不景，整體市場停滯不前，惟有割價競爭。有通脹對食品股是好事，可適量調整售價，但豬有豬周期，菜價主要睇天氣，通脹未必長時間高企。

講番三隻台資食品股。台資，點解業績特別差？皆因收入幾乎全部係人仔，但借錢則借美金，所以康師傅和旺旺均蒙受巨額外匯虧損，相反統一90.8%借款為人民幣逃過一劫。以前人仔年年升值，台資賺匯兌都賺到笑，估唔到舊年大逆轉；好在近期美金回軟，人仔變相升值，暫時唔使咁驚。

受惠原材料跌價

至於基本因素方面，康師傅的即食麵登陸中國仲早過可樂，但經濟發達追求健康趨勢而變OUT，在市場走下坡之時反而推出貴價即食麵，被喻為策略失誤，去年方便麵及飲品營業額分別下降12.7%及9.6%。不過，飲品最大成本係包裝器皿；去年油價大跌亦令膠樽成本下降，所以業績先唔使咁難睇。

旺旺的飲品業務佔總營業額一半，但以乳品佔較多，亦受惠於包裝材料及全脂奶粉價格下跌。賣飲品期望天氣愈熱愈好，但預測天氣更難於預測股票走勢，實在難以奉告。然而，以產品類別而論，康師傅受市場環境和競爭較為激烈，旺旺的消費者對象為兒童及青少年，所以值得較高估值。

假設今年不再錄得匯兌虧損，康師傅一六年的預測市盈率約20倍，旺旺則為15倍，兩隻揀定以旺旺秤先，但業績後綜合幾間大行給予的平均目標價僅5.65元，仲低過昨日收市價。在下並未似大行對該股咁悲觀，相信旺旺仍有吸納價值，但只限於低吸，好似昨日勁升後高追，實有違該板塊的特性。

此外，食品是各項通脹當中財金官員最不樂見，原因是普羅大眾在扣除食品開支後才用於消費，隨時因此買少件衫或買少對鞋。昨日百麗（01880）發盈警又創新低，有分析員認為除內地宏觀經濟放緩之外，公司品牌亦甚可能出現問題，另網店競爭導致流失市場份額，睇落真係幾閉翳。