Fundman睇市：三桶油不宜沾手

A股一場股災，舊年中國以政策牛市，推動經濟的如意算盤打唔響，阿爺即刻把戰線轉移，走去力托樓市。大媽見無股可炒，熱錢紛紛湧向樓市搵食，結果樓市在經濟奇差的環境下，背馳地出現拗腰回升現象，到上個月，就連三線城市平均樓價都止跌並錄得0.1%升幅，一線城市升到爆廠就更唔在講，過去一年深圳樓價漲幅達57.8%，同隔條河的北區樓市，真係天壤之別。

政府出招挺股市

針對部分城市樓市過熱，今年兩會提出區域性調控的構想，上星期，上海終於推出被譽為史上最辣的新政，分三招應市，包括二套房普通住房，首期比例不低於五成，非普通住房首期更不低於七成；非滬籍人士購房條件，社保年限由2年提升至5年；嚴禁房地產企業與中介機構從事首付貸、過橋貸等場外配資金融業務。

今次三招確實幾辣，一線城市非核心如鄉郊地段，在大幅提高首期比例之後，業界估計短期熱度必定降溫，而深圳與北京等漸見泡沫形成的地區，估計都會排住隊出招。早排建議趁高減磅，或換入因為基建需求回升，無直接受衝擊的水泥股，應該都無個錯字。

話時話，咁啱人行行長周小川，鼓勵民資進入資本市場被解讀成呼籲居民存款流向股市，上星期證金公司減融資息率，場外配資又再死灰復燃，看來有形之手，正趕熱錢由樓市回流股市，依家只係要睇，金魚一樣得幾秒記憶的A股大媽，可唔可以盡快忘記傷痛，重新上路。

講開樓市，內地資金在全球四圍掃貨，本來唔係乜新聞，如果想了解一下，看官只要周末去中環幾間酒店的臨時展銷廳睇下，已經唔難見倫敦、悉尼等內地客至愛的磚頭市場，賣樓好似搶奶粉同疫苗一樣。啱啱周末去八吓，可能英鎊因為脫歐公投關係弱咗，當地樓盤唔單止叫價愈來愈進取，亦都有愈來愈遠離市中心的趨勢。

早排有統計話，去年加拿大溫哥華樓市，三分一成交由內地買家承接，咪話唔誇，有朋友本來舊年返溫哥華置業定居，因為內地買家追價愈來愈狼，往往一個盤十幾廿個bid，搶到業主放盤價高三、四成之餘，更係唔經銀行可以短期科晒水，搞到普通買家根本上唔到車。

內地客全球搶樓

唔少人估內地經濟唔好，內地客購買力會減弱，實情人行愈聲嘶力竭話人仔無貶值基礎，內地客愈驚，趕住將人民幣仲有超強購買力之下走得就走，搶到全球大城市樓價都貴晒。

前周美國原油庫存急增至940萬桶，遠高於市場預期的310萬桶，拖累油價回落。事實上，油價由低位反彈三成有多，累積升幅不少，相信新一輪跌勢即將展開。三桶油假期前明顯有沽壓，中石油（00857）全日跌4.28%，收報5.14元，中海油（00883）及中石化（00386）均跌逾2%。

油價下跌，對油企的盈利構成直接打擊，中石油去年少賺67%至只有355億元人民幣，是上市以來最差的一份業績，至於周四公布業績的中海油，盈利同樣錄得66.4%的跌幅，至只有202億元人民幣，可見油價下跌對油企的盈利造成極大的殺傷力。估計油價今年仍會在低位反覆徘徊，油企盈利難免會進一步受壓，前景難以樂觀，而多間大行在中石油公布業績之後，相繼調低其目標價，相信中海油亦會同一命運，三桶油暫不宜沾手。