假期傳來內地出招應對正在升溫的一線城市房地產市場。所指的是上海公布《關於進一步完善本市住房市場體系和保障體系促進房地產市場平穩健康發展的若干意見》，顯見阿爺係要協助整體樓市去庫存，但唔等於容許有人藉此炒作。

A股精要

「辣招」內容主要係非戶藉上海家庭必須社保連續繳納五年，才有購房資格；二套房的認定，認房又認貸；另二套房的首付成數提高至五成，非普通商品房提高至七成。唔少人以為「辣招」喺公布後翌日才生效，趕緊「網簽」，該市單日最高成交2,499宗，點知官方話即日生效，睇嚟未來一個月趕錯車或者後來才發現未具新購房資格的「退房」個案將急升。

收購助提升盈利

呢期市場消息時好時壞，冰火交煎，不如睇番啲受相關政策消息影響程度較少的日常消費股。華潤啤酒（00291）雖然冇咗藍籌身份，但經驗相告，脫藍者焉知非福！早前潤啤已宣布以16億美元收購華潤雪花啤酒餘下49%股權，一來作價唔係貴，二來全資擁有後，可進一步提升盈利能力。

綜觀近年啤酒市場競爭激烈，毛利率受壓是普遍現象。去年下半年潤啤的銷售有所擴大，今年能否在適當時間提高產品均價，仍要拭目以待，惟若年內交易順利完成，則盈利表現有保證。潤啤上周四收報14.32元，股價每逢回落至12至13元水平，都是收集機會，中線上望16元，失守11元止蝕。