香港土地短缺，要維持穩定嘅土地供應並不容易。劉Sir知道政府下個財政年度透過產業署騰出多達4幅土地另作處置、重新發展或作其他用途，佔地加埋超過60萬方呎，比起今個年度勁增大約5.8倍，總面積係近三個年度最大，其中就以屯門掃管笏前寶龍軍營（部分）佔地約莫45.86萬方呎最具規模，呢幅地亦已經分割為兩幅住宅地，兼且納入咗賣地表入面。

屯門掃管笏前寶龍軍營（部分）用地，即國際十字路會現址，地皮已納入賣地表中。

產業署協助騰出地皮

劉Sir都知改變土地用途成為咗近年政府增加供應嘅慣常做法，睇番產業署資料，該署本年度騰出另作處置、重新發展或作其他用途的土地有1幅，呢幅佔地約莫8.82萬方呎嘅屯門前歌頓軍營用地，已經改咗做住宅用途，並喺舊年九月以17.3億元批出咗。

掃管笏項目佔地最廣

而產業署嚟緊加快協助出騰出土地，資料顯示，該署下年度預計騰出4幅土地，佔地加埋超過60萬方呎，比起今個年度勁增約5.8倍，其中佔地最廣嘅都係屯門地皮，呢幅屯門掃管笏前寶龍軍營（部分）用地，佔地廣達約45.86萬方呎。

美利道停車場劃商用

劉Sir知道呢塊地皮其實已經喺舊年加插入賣地表，仲「一開為二」拆為屯門第48區青山公路－－青山灣段、同埋掃管笏段兩幅地皮，佔地約莫16.58萬同埋29.28萬方呎。

此外，下年度騰出嘅地皮仲包括中環美利道多層停車場，將會劃作商業用途，地皮亦納入咗下年度賣地計劃入面，項目佔地約莫3.1萬方呎，市場估值高達67億元。而摩星嶺前域多利扣押中心（部分）、同埋前西貢中心小學，就會改為非牟利專上院校、以及社會福利用途。

劉Sir老友高力國際張翹楚就咁睇，佢話政府覓地不外乎增加地積比率、或者改變政府土地用途，但由於地積比率唔能夠一時間就可以調整，所以改變土地用途會相對方便快捷，佢估計改劃土地用途嘅情況，喺未來一定會愈來愈多。

另產業署資料亦顯示，本財政年度一共賣出14個過剩宿舍單位，雖然較上年度嘅23個單位少咗約39.1%，但總售價約4.5億元，就按年出現約12.5%增長。