大學生掘金 幣中有機

樹仁Harvey：買8部電腦挖Bitcoin

樹仁大學工商管理學系二年級生Harvey早在中學階段，當Bitcoin未興起時，他偶然在外國論壇上，聽到Bitcoin這類新奇有趣的虛擬貨幣，便上網去了解，然後很快便被它的投資潛力所吸引。「上網自學程式語言挖Bitcoin，無咩成本，但又可以賺錢，真係唔錯！」他當時真的着迷，上網研究挖礦技術，不惜捱夜至早上四時，然後六時上學。

第一次聽到虛擬貨幣，通常會質疑其價值及可炒作性，但他卻認為有危就有機，早料會有炒Bitcoin的熱潮。

玩虛擬貨幣賺廿萬

Harvey說：「喺電腦技術愛好者嘅角度，Bitcoin係好犀利嘅創新；喺經濟學家嘅角度，佢係人類史上出現過最完美嘅貨幣；喺投資者嘅角度，佢係潛在嘅筍盤。」而Harvey較其他人容易接受這項另類投資，或因他一直愛鑽研電腦軟硬件，且過去亦有投資股、金、匯經驗。

「玩Bitcoin有三類人，好似我嗰啲，叫做礦工；另一類係投資者，用真錢買Bitcoin嚟炒；最後一類係用家，用真錢換Bitcoin嚟買野，做交易。」他指出，做礦工挖Bitcoin的成本只是時間、電腦設備的購置及電費，「對於一個學生，時間未算好值錢。而只要屋企部電腦有張強勁嘅顯示卡，就可以挖，所以都無咩成本。最瘋狂嗰時，都係買咗8部電腦一齊挖，再加每月幾千蚊電費啫！」

作為先頭部隊，Harvey成功飲了頭啖湯，「Bitcoin由幾仙開始，被人炒到八千幾蚊人民幣，之後個價就一直跌，一路跌我就一路沽，所以我都賺到錢。」他未計過單在挖Bitcoin所賺到的利潤，但在投資虛擬貨幣的總回報，扣除硬件等成本，純利20多萬元。他更笑言：「我喺虛擬貨幣賺嘅錢比起在股、金或匯賺嘅多。」

出奇地，他其後在其他虛擬貨幣賺到的比在Bitcoin還多，「當愈嚟愈多人認識Bitcoin，挖Bitcoin嘅利潤就會被攤薄。當我發現挖礦賺到嘅錢連電費都交唔起，我就轉咗去炒Bitcoin同發掘其他虛擬貨幣！」他明白過了飲頭啖湯，就難再賺錢。

有了挖Bitcoin的經驗及電腦硬件等配套，挖其他虛擬貨幣所費的力氣及成本便相對少，只要挑中一隻將被熱炒的貨幣便行，當然難度極高。Harvey稱，一分耕耘，一分收穫的道理應用在投資股票或是虛擬貨幣上，都是適用的。

理大Adam：用程式炒外匯

理工大學投資科學系三年級生Adam年半前學用程式交易，發現外匯市場非常大，較難被人操控，亦較易用技術分析找趨勢，便開始炒外匯。

他說：「比起炒股票同期貨，外匯近二十四小時都有波幅，而歐元、日圓等貨幣嘅交易量又大，所以唔使太驚無人接你啲貨，又或好似細價股咁，價位單邊走。」

Adam透過外國的外匯商買賣外匯，包括歐元兌美元、日圓兌美元及澳元兌美元。他說：「我係美元大淡友！通常都買其他貨幣升，買美元跌。歐元過去有好多負面消息炒作，但係呢一年嚟都喺低位橫行，所以歐元已經見底！」由一五年初至今，歐元兌美元徘徊在1.05至1.15區間。

留意央行取態定策略

他炒外匯主要是留意各央行發布的言論所用的字眼，「我會問點解去到某個價位，央行會講呢番說話；而到議息嗰陣，聲明裏所用嘅字眼又有咩唔同。我會好留意央行對息口嘅取態，從而估算外幣走勢。」他一般在議息前數天入市，然後持倉一天至最多一周，「匯價升跌就好似鐘擺咁，經過大方向嘅轉變之後，就會喺一個波幅範圍上落，而我就趁機低買高賣。」

投資者不斷短炒，手續費昂貴？他說：「長揸外匯幾危險，各央行隨時會突然改變貨幣政策，所以好難估。我每次買賣外匯嘅手續費係匯價嘅3點子，唔算貴。」

因資金有限，Adam就用槓桿去增加回報，但他也會做好風險管理。「我會放錢喺外匯商，我亦有設立止蝕位，所以就算蝕住，我都習慣狠心離場。

Adam分享他近期最成功的一次投資，是當日本宣布負利率措施後，日圓應聲下挫，但翌日便告回升，於是他便分段買日圓沽美元，兩天後沽出，賺近1萬元。日本央行今年一月二十九日宣布負利率，日圓兌美元即日跌1.92%，其後連續四天掉頭累升3.73%。