今日係復活節前交易日，首季亦僅餘四個交易日，季內兩地股指都先跌後回升，其中恒指和國指都收復大部分失地，而滬綜指亦順利重上三千點關，總算係有驚無險！

佔統一收入逾三成的方便麵業務，首季改善勢頭良好。（資料圖片）

回說昨日A股，尾市在券商股發力下，滬綜指重上3,000點關收市。表叔線話今轉A股升浪可以持續至四月上旬，但滬綜指去到3,100點回吐壓力頗大，跟炒中資股到咁上下要識得落手割禾青，唔好衰貪心，畢竟依家唔係大時代，唔好吓吓磨爛蓆！

次季港股難望大升

昨日港股恒指波幅唔夠兩百點，但已一連多天企穩20,500點樓上，整固過後，若外圍市況配合，季結前後仍有機會衝21,000點關，但在基本因素缺乏明顯改善下，再大升的空間似乎唔大。

展望第二季，人民幣匯率失驚無神貶值，以及美息去向，仍左右大市方向，喺更多經濟數據支持內地經濟回穩前，市況仍會以震盪上落為主，與其賭指數上上落落飄忽難捉兼又冇咩肉食，倒不如繼續玩對對碰打遊擊主攻板塊。

食品股統一企業（00220）最近公布業績，受惠產品結構調整、原料成本下降，去年度賺8.4億人民幣，增長1.9倍，表現符合市場預期，亦可確認去年盈利已重納正軌。年內公司的淨負債比率由前年度的34%降至11.5%，經營現金流正數，在資本性開支見頂下，整體財務狀況持續改善，今年派息比率有望提升。

經營層面方面，去年下半年內地經濟增長進一步放緩，但基本上公司業務保持穩定。今年首季在同比基數較高之下，增長未必太突出，但次季有望提速增長。事實上，同業競爭並未曾緩和過，銷售增長的同時要保持毛利率穩定，才能經營出好成績。統一在開發產品方面，去年的成績勝同業，尤其是佔集團收入逾三成的方便麵業務，首季改善勢頭良好，經營成本及銷售開支等因素趨穩定，毛利率有擴張的條件。

以現價計，統一的一六年度預測市盈率約23倍，對比競爭對手康師傅（00322）及旺旺（00151），吸引力只屬一般，勝在業績趨於穩定，且至去年底公司的總金融負債中，90.8%係人民幣，餘下9.2%借款係美元，若扣除手頭美元現金，實際手持淨美元現金為1.8億美元，受人民幣再次貶值的影響相對減少。昨日該股收報5.96元，升2.23%，向上較大的阻力在6.5元，回吐宜守5.4元。