Fundman睇市：電力股睇淡有原因

聯儲局出口術，令市場對加息預期進一步降溫，美元已拒絕再升，美匯指數在98至100阻力，三頂不破，連同商品的反彈，成功製造一次相當立體的冚倉潮，道指又再逼近去年底17,796至17,977點的三頂阻力。

華爾街股市可否破位，延續強勢，是一眾投資者三月底、四月初部署的重要考量，對於港股投資者，似乎中國近日的大動作，影響可能更加深遠，阿爺有迹象準備放水畀A股大媽再癲過，單睇過去八日，滬綜指七支陽燭，A股大有山雨欲來的氣氛。

政策牛重臨A股

舊年A股爆煲之後，阿爺力托樓市，美其名是要解決三、四線城市庫存問題，講到底都係唔想見樓市冧檔，加劇股災後財富萎縮效應，拖跨本來就死吓死吓的內部消費。

要知中國經濟從來環環相扣，未解決一個問題，新問題又浮面，大媽唔炒股，結果熱錢順應國策走去炒樓，經過由打壓變成托市的一年，今日三、四線城市去庫存未竟全功，一線城市樓價卻率先升到爆廠，兩會期間，已放風話可能出區域辣招應對。

近日央行行長周小川在G20話推動資本市場發展，及後澄清指市場錯誤解讀，佢並非鼓勵人民拎銀行存款去炒股，但口裏說不，行動卻很老實，近日先有證金公司減融資費率，配資公司在監管放鬆下，亦有捲土重來之勢，陸續出現孖展任借情況，筆者勝信，中國正試圖炮製新一浪人造牛市，準備炒冷飯，再一次使出股市救經濟的招數，順便為投機熱錢過剩的樓市減減壓。

政策牛2.0行唔行得通？當然要睇大媽落唔落疊，客觀環境，舊年國家隊入市收乾唔少權重股，有利於炒上，救市後，阿爺包底成為大媽共識，A股從來是賭徒天堂，有大莊家批准賭白頭片（配資及券商放貸鬆手推波助瀾），A股爆上去絕對唔出奇，如果揸唔定主意追邊個板塊，索性吼返A股ETF，未來兩個月好可能有意外收穫。

近日本地大孖沙不約而同對今年樓市發出短期看淡的言論，估計調整未完成，但見本地地產股一月中開始，一直保持反彈勢頭。自○七年開始，地產股與樓價有脫鈎情況，以往高樓價，地產股較資產淨值呈溢價情況不復再。當下，地產股閒閒哋有三至五成資產折讓，預先反映較低售樓量以及樓價下調的風險因素。

新地下跌壓力細

當然，近日地產股反彈，與歐日推行負利率，美國加息幅度有限有關，再者，本地地產商淨租金佔總收益比例，也見持續增加，新地（00016）去年十二月底止中期淨租金收益79億元，儼然半隻收租股一樣，3.7厘股息率，在低息環境持續下，現水平估計下跌壓力應該有限。

內地電力股陸續出成績表，受惠於低煤價，華能（00902）去年賺136.52億人民幣，升26.9%，潤電（00836）賺100.25億元人民幣，升8.8%，去年兩隻電股售電量分別錄得8.8增長及6.5%的倒退，但單位燃料成本分別大跌14%及21%支持下，業績雙雙維持難能可貴的增幅。

兩股在業績後都有見光死現象，顯然投資者唔信一五年賺大錢的日子，未來可以延續落去。內地電企發電高增長期，經已在出口製造業持續低迷下告一段落，進入單位數的緩慢增長期，電企售電量既靠收購貢獻增長，更怕是計劃經濟下，阿爺要電企回饋社會，未來出現電價減幅比煤價更大的情況，現在的低估值高股息率，正預示這方面風險因素。