長假期臨近，資金轉炒二三線及創業板股，藍籌動力進一步減弱，昨日恒指全日波幅得180點，跌51點報20,615點。恒指已是一連五日困在20,435至20,772點之間，延續高位整固態勢。

展望復活節長假在即，多少影響了基金經理高追興趣，但怯於A股無假放，想掉頭做淡，被挾風險唔細，形成港股陷入拉鋸局面。期指昨早市未能突破20,700點，見20,688點已掉頭，期指以每二、三十點的喊低，尋找即市支持。午後最低見20,517點，之後因A股拗腰，以午後最高位20,645點收市，成交10.5萬張。

昨日建議以期指收市能否企住20,600點樓上定去留，結果最後十五分鐘由20,597點彈高48點收，臨尾低水轉炒高水，但筆者最後都選擇在帳面輕微損失下，先將好倉倉底減到三分一持貨。

四日長假期在即，今日市況會更靜，想平手甚至更低補回應唔難，反而道指超短線有轉勢信號，決定減低過夜張數，先避其鋒。