新盤市場烽煙四起，新地（00016）繼推出何文田天鑄第二期喺明日起開售之後，昨日又接力公布將軍澳海天晉開價，首張價單推126伙，價單平均呎價14,380元，折實平均呎價約12,400元，比起同區臨海新盤做價最多平逾一成，但與區內二手屋苑比較就算貼市，折實一房售價約424萬元起，發展商仲提供樓價15%免息前期貸款，買家最少只需樓價5%就入到市。

新地雷霆（左）表示，海天晉首張價單市值逾9億元。旁為陳漢麟。

海天晉首張價單推出單位

同區一、二手屋苑平均呎價

近排新地副董事總經理雷霆真係好忙，一時見佢出嚟介紹天鑄第二期，一時又要出嚟介紹海天晉。

引入優惠 預告或提價

昨日佢就同劉Sir講，趕得切喺復活節長假開始前落實海天晉開價，首張價單推出126伙，間隔一房去到四房，價單平均呎價14,380元，扣除平均折扣約13至14%後，折實平均呎價12,400元。

佢認為，海天晉折實開價比起同區過去六至九個月新盤開價為低，同天晉系列二手屋苑做價就相若，佢形容開價係優質開心價，未來有提價空間，而今日起就開放示範單位同埋收票，每張收票金額為10萬元，希望月底前可以開賣。

新地助理總經理陳漢麟補充，海天晉提供多種付款計劃同全方位財務優惠，仲引入樓價15%免息前期貸款，即係買家最少只需要樓價5%首期就可以入市，同時又提供備用高成數一按，最高貸款額去到樓價八成。

睇番張價單，項目首批單位折實售價由424.6471萬元起，即買家最少只需20多萬元首期就可以入市。項目指定單位可選用BSD回贈優惠，總優惠高達樓價兩成。

華懋雲門5551萬成交

海天晉樓書昨日正式上載去到一手銷售資訊網，根據條例即係最快下周可以開售，睇番樓書資料，項目628伙實用面積由345去到1,655方呎。

至於同區一、二手屋苑做價，同樣係將軍澳南臨海新盤嘅帝景灣，平均實用呎價逾1.45萬元，區內二手屋苑天晉嘅平均實用呎價約1.29萬元，將軍澳中心則售1.16萬元，將軍澳廣場就約1萬元。另外，華懋嘅九龍塘雲門昨日賣出1座8樓A單位，成交價5,551.1萬元。