樓價自從舊年底高位回落之後，細價上車單位成交比例明顯增加。劉Sir翻查土地註冊處資料，發現樓價300萬至500萬元以下住宅成交登記比例，從舊年九月樓市高峰時嘅39%，升4個百分點去到上個月嘅43%，創一三年十月以嚟最高；細價樓集中地嘅沙田區，期內成交比例亦上升3.3個百分點，係各區中升幅最大。

上車盤集中地的沙田區，上月整體樓宇成交增。

沙田第一城價跌，吸引上車客入市。

上車盤按月成交比例

樓市轉勢令「三、四字頭」成交湧現，呢類上車單位佔合約登記比例亦因而增加。劉Sir睇番土地註冊處資料，二月份住宅買賣登記裏面，300萬至少於500萬元物業買賣佔43%，比舊年九月樓市高峰時上升4個百分點，係一三年十月以來最高。

沙田買賣佔全港11%

部分偏遠地區上車盤更加跌至「二字頭」，令呢類物業成交比例比舊年九月大升7個百分點至13%，亦都係一四年九月以來最高，升幅係各類物業中最大。

上車盤集中地之一嘅沙田區，上月整體樓宇成交登記佔全港11.1%，較舊年九月升3.3個百分點，係全港升幅最大。

以沙田第一城為例，「細三房」戶型去年曾一度做出645萬元新高價，其後樓價已屢次跌穿500萬元，到最近曾低至470萬元成交；屋苑兩房戶成交亦由去年高位468萬元跌至近期大約330萬元。

另外，有多個上車屋苑嘅荃灣區，上月登記佔全港的12.1%，亦都比舊年九月升3個百分點，係升幅第二高。

事實上，平盤交投增加，亦都令高價物業成交比例顯著回落。上月500萬至少於1,000萬元住宅物業買賣登記只係佔28%，較舊年九月大跌10個百分點，係一四年五月以來最低。

至於1,000萬元或以上住宅買賣登記則佔10%，比舊年九月跌3個百分點，係一五年一月以來最低。

細單位獨旺 換樓觀望

劉Sir老友理工大學建築及房地產學系教授許智文表示，數據反映近期成交以細單位為主，而該類單位近日價格下跌，導致細價樓交投佔比上升。

許智文預期細價住宅登記比例進一步攀升機會幾大，因為樓價下跌都係集中喺細單位，至於換樓客對後市就普遍持觀望態度。