兩會曲終人散，繼中證監新任主席劉士余後，國務院總理李克強亦再次重申，力爭深港通於今年內開通。市場估計「通車」時間會在下半年，是否意味此前兩地股市會繼續反覆上落沒有大方向？如此的話，缸邊友次季首要還是繼續保留實力，短炒波幅小注怡情，等下半年再睇吓有冇機會食大茶飯。

A股精要

雖然前日住建部官員已就住房問題詳盡解答傳媒，但奇怪昨日總理會見中外傳媒，卻並未有談及任何關於房地產或房價相關的問題。到底是傳媒已無疑問，抑或係雙方「默契」唔提，不得而知，會唔會係中央認為房地產問題變數太多亦事關重大，相關議題「不好說」，以免被迫開空頭支票！

回說市況，焦點都放在美國議息結果，金魚缸交投淡靜。月初由炒作兩會掀起炒風的國策股普遍回吐，華能新能源（00958）跌約4%，中鐵建（01186）跌4.2%，鋼鐵、汽車股均現回吐。不過，其實針對內地本土的問題，一切在中央可控範圍內。反而，外部不穩定因素頗多，亦非中央可控，特別係一旦匯率再現波動，A股亦難免受波及。

炒國策見好要收

所以，唔單止係投資者，連執政者都要諗過度過先出招，產業利好消息會如「擠牙膏」式一路擠啲擠啲，免得受外圍拖累浪費彈藥，故跟炒國策消息，至緊要見好識收。

過埋呢個季結，四月頭可能都要回回氣，等四月中下旬公布的經濟數據靚仔番啲，先至再次發力。又睇番業績股，內房碧桂園（02007）去年度少賺9%，基本上在市場預期之內，但績後多家投行調低其評級或目標價，主要是見到公司毛利率收窄，增加發債令融資成本增加，以及每股股息下跌等。

事實上，公司舉債但未有落實收購，利息白付，負債比率升高，加上集中發展低端城市，這些因素均不利估值，基金手起刀落不無原因。

股價方面，碧桂園由周初高位3.52元，回落至昨日低位僅2.99元，若短線能迅速重上250日線3.15元樓上，則跌勢有望喘定；但若然未能收復失地，則有機會再試去年十月以來的重要支持2.8元水平，再覓方向。