股價五年爆升逾八倍、被喻為「電動車界的蘋果公司」的Tesla（特斯拉）（美股︰TSLA）近期動作多多，最近宣布推出「免插充電系統」，同時全城注目的Tesla Model 3又於本月底接受預訂，近30萬元的售價令人眼前一亮。公司股價亦好似Model 3突然「減價」，自去年七月高位回落，唔知Tesla股票係咪又好似電動車咁，值得買入同時又揸得順暢呢？

陸東認為，要靜觀其變。

香港用家對Tesla看法

Tesla近5年股價走勢

陸東：寧願買車不掂股

Tesla一改常態，將Model 3的售價定得更貼近大眾用家，若計及香港稅務優惠，大約27萬元便可初嘗駕駛Tesla Model 3的滋味。今次「減價」，市場認為是Tesla欲打入中低價汽車市場，增加市場份額，就連星級分析員陸東都對Model 3都有興趣。

陸東於去年購入Tesla Model S，結果一試愛上。他說：「我主要因為三大因素決定改用電動車，第一，環保；第二，唔抵得石油公司壟斷市場，油價跌咁多，但零售油價無大減過；第三，Tesla價錢相宜。從舒適度、汽車性能、環保等多方面都覺得唔錯。」

推平款明顯谷市佔

雖然陸東是Tesla的用家，但從價值投資角度而言，電動車股份未夠資格列入他的心水名單。陸東說：「電動車股份好似Tesla同埋比亞迪（01211），兩間都有好多『夢想』因素在內，賣嘅係concept。雖然我buy呢啲concept，全世界都行緊呢條路，但唔代表佢哋會賺好多錢。」他直言，以投資者身份來說，要靜觀其變。

他說：「我會留意新款Model 3銷情，睇收入及利潤率，呢一刻Tesla仲蝕緊錢，明顯係買緊市佔率。」事實上，Tesla自二○一○年上市至今，從未錄得任何盈利，去年全年累計虧損達8.89億美元，較一四年多兩倍。不過，公司年初預喜，料今年銷售額升60至80%，更揚言今年第四季有望轉虧為盈，期望首次錄得經調整後盈利。

近半大行分析建議買入

據通訊社綜合券商預測，23間大行分析員中，近四成半予Tesla股份「買入」評級，三成為「持有」，只有兩成半為「賣出」，十二個月平均目標價為240.13美元，較現價高近10%。晉裕環球投資研究部投資策略師黃耀宗表示，電動車是全球發展大趨勢。

黃耀宗說：「Tesla電動車性價比高，創辦人馬斯克係電動車界嘅王者，具前瞻性諗法，唔可以用估值去評估股價係便宜定昂貴，投資者對公司具信心，令股價偏離估值。」

不過，沽空機構Citron Research月初瞄準Tesla狙擊，認為公司未來數月在供求及付運方面出現問題，料股價年底前跌至100美元，較周二收市的218.34美元低54%。一旦Citron Research的預測成真，或提供一個吸納機會。

170美元可吼

黃耀宗指，長線來看，公司的前景沒有問題，股價未跌穿140美元的話，在未來五年相信股價飆升至400美元亦不足為奇，建議投資者待股價回落至170美元吸納。他認為，電動車前景可觀，一旦公司的叉電速度及電池行車距離有突破，便能在電動車界突圍。

自動駕駛港受限

Tesla去年推出Autopilot半自動駕駛系統，惟因香港運輸署指功能的危險性未被確認而被迫撤下。昨日運輸署終批准自動行車線轉換及自動方向引導輔助駕駛兩功能，但仍受限制，包括須在設有中央分隔欄的道路、車速限制為每小時70公里或以上的道路使用，同時車輛須向司機展示適當的警示訊息。