Fundman睇市：中船防務前景亮麗

上周中，港股以超過九百億成交抽升，隱隱然見到靠邊站多時的基金經理，恐慌拋售變成恐慌性追貨。上周五趁美股隔晚小升，港股小休後又發力，再攻下兩萬點關口，恒指升234點收報20,176點。憧憬兩會後的保增長措施，貨幣政策推廣至政策層面，兩會概念出奇咁好炒，上周五資源、新能源、工業及汽車股均成為基金追落後對象。

汽車股繼續落鑊

鋼鐵、水泥以至工業設備板塊近日陸陸續續翻生，主要係見多間外資行，不約而同向基金客力推有關。佢哋叫賣緊三月內地經濟有復甦苗頭的美麗故事，原因係發改委審批的大型基建項目，在春節長假後陸續動工，配合傳統三月內地大宗商品補庫存周期，預計將會拉動價格及需求向上。

其中一個指標，如二月內地重卡車銷售3.2萬輛，按年勁升一成六遠勝市場預期，亦係一四年八月以來首月錄得增長，配合阿爺力托樓市，一、二線城市樓價經歷俯衝後的急升，預計春節後施工進度將因此加快，中國重汽（03808）、濰柴動力（02338）因為咁掃到甩晒碌。

上周五另一亮點是汽車股全線落鑊，吉利汽車（00175）最叻升10%，長汽（02333）升7.7%、華晨（01114）升7%、東風（00489）升4.7%及比亞迪（01211）升3.9%。向來汽車股分析員都有「早收幾日風」傳統，二月受春節假期影響，本來車市銷情被睇低一線，各大車廠銷售數據曝光前夕，汽車股咁齊心爆升，理由都唔使畫公仔畫到出腸！

上周五收市，長汽的二月銷售數字認真係對辦有餘，銷量5.9萬輛按年升14.5%，增幅比一月的2.8%大，之後仲有冇扶持新能源車的措施？史提芬暫時冇收到風，但車股過去兩、三個月被唔少淡友糟質，累積空倉唔少，睇嚟有機會趁二月比預期好的數據，來一次報復式反彈，隨時炒埋落去睇埋三月份數據都未定。

被外媒率先披露，新秀麗（01910）上周五證實，斥資142.3億元收購在高端商業產品市場上鬥生鬥死的對手Tumi。Tumi本身有一批機長、IT人及美企高管粉絲，兩間公司產品文化可唔可以順利融合，獲捧場客接受，有待時間證明。

時代集團望多兩眼

買Tumi出價大約等於28.9倍PE，以一間北美洲經營得唔錯的商務手提包及工事篋品牌，主觀睇唔算貴，但對每股盈利即時作用應該好有限，上周五新秀麗股價開24.7元，縮番落去24元收，最後升1.2%。

事件中，反而好奇係同Tumi代工生產商時代集團（01023），新秀麗一年銷售收入差不多是Tumi的5倍，會唔會因為咁多咗代工生意，有貨的股民值得留意事態發展。

在兩會期間，除市場所關心的經濟政策之外，中國軍費亦是市場關注所在。而中國軍費今年預算保持增長，其幅度在7至8%之間，比前幾年要低，因此上周五軍工有關板塊表現未算突出，只有中船防務（00317）升勢較為凌厲。

去年中船全資子公司廣船國際與上海淩翔訂立買賣協議，以35.29億元人民幣出售廣船船業權益，從而專注拓展軍工相關業務。去年上半年，集團已完成收購黃埔文沖100%股權，成功注入核心軍工資產，進一步提升其軍船和海洋工程裝備建造實力，估計未來中船將可獲得更多合同，為海軍建造高科技及高利潤的船舶和設備。

市場估計未來五年內地建造新軍艦支出的年複合增長率可達三成，而且市場憧憬母公司會將更多軍事資產注入公司，在此憧憬下，股價可望反覆向好。上周五中船股價升7.7%，收報12.5元，成功收復50日線，成交亦見配合，料可進一步挑戰15元關口。