今個禮拜將會有兩幅住宅地皮截標，包括今日截標嘅港鐵（00066）將軍澳日出康城第十期，同埋禮拜五截標嘅赤柱黃麻角道豪宅地，其中日出康城第十期由於地價比之前大降近20%，相信入標反應唔錯，至於赤柱地皮係罕有港島區優質豪宅地，早前雖然有測量師大幅調低估值兩成，但預計每方呎樓面地價最高可以做到2.4萬元，有機會成為今個年度呎價地王，地皮估值最高約54.3億元。

本周兩幅截標地皮基本資料

赤柱黃麻角道地皮（箭嘴示）佔地超過27萬方呎，位置鄰近富豪海灣。

理想城市張聖典表示，赤柱黃麻角道地皮鄰近山坡須勘察，或影響發展商出價。

將軍澳日出康城第十期喺今日截標，項目早排收到24份意向書，係日出康城歷來接獲最多意向書嘅純住宅項目。

康城十期反應料佳

劉Sir知道，康城十期補地價約16.59億元，每方呎樓面補價約2,044元，比舊年底批出嘅第九期仲低19.7%，分紅比例固定20%，發展商要額外出價競投。

該項目提供介乎751至1,170個住宅單位。市場人士相信今日入標反應佳。

另外，黃麻角道豪宅地，佔地約27.2萬方呎，總樓面就大約22.6萬方呎，預計可以提供大約180個單位，地盤位置鄰近富豪海灣，由於港島優質豪宅用地一向都好短缺，嚟緊星期五截標嘅黃麻角道地皮勢必成為本年度呎價最高地王。

劉Sir老友高力國際張翹楚早排就因應市況回落，調減咗呢幅地皮約莫兩成估值，預計每方呎樓面地價大概2.4萬元，估值大約54.3億元，佢話會維持呢個估值。

如果呢幅地皮真係以呢口呎價批出，就會成為今個財政年度方呎樓面地價最高地王，並且係一四年五月以來呎價最高嘅政府住宅地，當時南區壽臣山道西與黃竹坑徑交界豪宅地嘅每方呎樓面地價就達約30,888元。

赤柱地有山坡因素

不過，最近部分土地出現流標情況，部分同地盤貼鄰嘅山坡保養問題有關，而今次呢幅黃麻角道地皮亦面對同類問題，有測量師老友對地皮嘅估值較為保守。

理想城市張聖典話，中標財團要負責就鄰近地盤嘅山坡進行岩土勘察同防護措施，而山坡面積正正同地皮嘅面積相若，或會影響發展商出價，佢估計每方呎樓面地價大約1.7萬元。計番地皮估值約莫38.4億元，係市場估值嘅下限價。