產油國宣布凍產而不減產，無阻油價慢火煎魚式反彈，隔晚一度見35美元，創近兩個月新高，二月中的26美元低位，愈來愈有機會是中期低位所在。國際銀行的CDS溢價大幅收縮，金融市場似全方位的進行冚倉，短期港股的反彈，估計仲可以持續多一陣。

內地啤酒市場競爭加劇，不利潤啤業績表現。（資料圖片）

太陽日誌　2016/3/4

經過周三大成交爆升後，昨日港股橫行整固，交投回到七字頭，恒指最多跌211點，低見19,791點，貼近周三上升裂口後，個市已有跌唔落的勢頭，尾市跌幅收窄，報19,941點，跌61點，近期落後的國指倒升16點，收8,390點。

聯想集團（00992）被IBM清倉，經高盛批售手上股份，跌4%收6.42元，僅僅守得住批股價，為表現最差藍籌，前晚多間國際銀行CDS溢價回落，CoCo Bonds債價回升，除淨的滙控（00005）升0.7%收49.65元，搶息的捧場客成功財息兼收，渣打（02888）仲靚仔，升5.1%收50元，早前建議撈底的首個反彈目標到岸。

減價戰風險上升

即將失去藍籌身份的華潤啤酒（00291），前日升過三成，最後升幅收窄到一成八，昨日再有3.8%進帳，收15.68元。潤啤以16億美元向SABMiller Asia購入其持有的華潤雪花啤酒49%股權，交易後，華潤雪花將成為潤啤百分百持股子公司，消息一出，潤啤勁彈，主要原因係交易作價比街外估計低。去年十一月，野村曾估交易金額可能達到36億美元，結果只及估計的四成四。

中國經濟高增長不再，各行各業都受到影響，就連啤酒市場都唔例外，唔信可以睇吓青啤（00168）股價自一三年底見底後，持續弱勢超過兩年，現價還不到高位一半。事實上，睇華潤雪花，一四年稅後溢利跌兩成一之後，去年營收再跌已是預期之內，以一四年16.8倍PE及0.93倍PB計，同以往內地啤酒產業天價估值相比，睇落係平，但俗語有句話叫寧買當頭起，長遠抵唔抵，見仁見智。

話說回頭，潤啤可以順利將雪花啤回購，要多得百威英博去年同SABMiller聯婚，合併之後，兩者佔全球啤酒市場份額超過三成，真係一統天下，但亦都要面對各地反壟斷的指控，放棄雪花啤酒也是為勢所逼。

值得關注反而是長遠中國啤酒業發展，市場原本由潤啤、青啤、百威英博、燕京啤酒以及嘉士伯五分天下，一四年數據，潤啤與百威英博本來坐擁三成七市場份額，剝離華潤雪花後，兩者由姻親關係一下子變番競爭對手，本就鬥生鬥死的內地啤酒市場，未來幾年價格戰升級風險也大幅提高。

筆者認為潤啤短炒一浸後，有貨在手的值得考慮趁勢食一食胡，事關未來幾個月，潤啤唔單止要面對一五年差勁的成績表，仲有可能受減價戰白熱化的負面新聞，影響股價表現。

農業股憧憬國策

兩會昨日正式揭幕，滬綜指全日升10點，而農業股亦憧憬會有利好三農的政策公布而做好。前日股價大幅波動的國農控股（01236）股價彈高24%，收市報2.35元。

事實上，國家一直重視三農發展，農業部去年的《政府工作報告》明確要求增加深鬆土地面積2億畝，並納入國務院量化指標考核內容之一。此外，亦有消息指農業裝備未來十年發展路線圖已確定，目標到二○二五年，農業工業總產值要達八千億元人民幣，國產農機產品市場佔有率95%以上。

國農為央企背景，近年發展相當積極，並推展全國的三農互聯網金控布局，發展潛力可觀，同時可直接受惠國家支持農業金融發展的國策。此外，集團控股股東近日增持公司股份，投資者不妨留意，吼低吸納作中長線持有。