政協開幕,A股靠穩,港股則有回吐,整體而言,市場氣氛有改善,但係咪成氣候就好難講,畢竟本月美國議息,加埋基金季結,月頭升得太急的話,月尾好可能又再翻天覆地了!

A股精要

新能源汽車是兩會熱炒主題之一,去年動力鋰電池行業產能大幅擴張,今年發展將由量轉質,龍頭企業憑質量跑出,主導市場發展,汰弱留強在所難免。事實上,新能源汽車在生產技術上並不困難,關鍵是電池的安全性及耐用度。筆者喜愛的比亞迪股份(01211)及比亞迪電子(00285),仍是主力持倉對象。至於有冇其他同業今年內可突圍而出,不妨拭目以待!

至於冷門題材,筆者想起核電股,事關呢個板塊經已靜咗好耐。哈爾濱電氣(01133)股價守穩2.55元後反覆回升,10日線剛重上20日線,昨日收報2.91元,若短線有成交配合突破3元關,是浪目標可定在3.5元。至於核電設備股,上海電氣(02727)近日股價重上50日線,昨日收報3.54元,重大阻力位在4元關。

不難重上12元關

大晒士綜合性中資股,筆者仍傾向留意復星國際(00656),事關觀察咗近月走勢,10元關承接經得起考驗,照計現時係低吸時機,市況配合下,中線唔難上番12元關。

基本面方面,復星截至去年六月底止,手頭現金等值229億元人仔,加上早前出售一項海外資產套現逾兩億歐元,不愁併購資金;去年中績公司賺36億人仔,如無意外全年度業績唔差。展望保險業務穩步增長,再加上在中央扶持下,內房氣氛改善,醫療健康業務前景向好,多元化的業務發展前景向好。

無可否認,早前因與高管相關的負面消息,令到部分芬佬決心斬倉,但有人辭官歸故里,有人漏夜趕科場,相信事件影響已告一段落,現價一六年度預測市盈率12倍,若然自問睇好中國經濟過到呢關,現價的復星比好多國際金融或大型綜合股更具投資價值。