人行降準在預期之內，兩地股市反應不太大，滬綜指及恒指均升不到2%。基本上，過去一年的減息降準效用有多大，投資者心裏有數，今次亦不例外，只是作為兩會前的維穩動作而已。

A股精要

外資對投資內銀行業態度由熱轉冷，繼去年底傳來德意志擬沽出華夏銀行股權，近日又傳來花旗擬出售廣發行股權。無他，這些外資沽售的內銀股權都不過是兩成或以下的少數股權，作為不大；再加上內地經濟增長放緩，銀行業前景受挑戰，即使眼前離場估值甚低，但還是傾向沽貨持現金為上策。咁落去，外資沽貨全由國企接手，同開倒車冇咩分別，如何加快金融改革，留住外資，不但是貨幣、財政政策的問題，更是市場體制和基建的問題。

救樓市政策陷兩難

事實上，一個好簡單的問題，股市暢旺，銀行非利息收入增加，利錢可觀，盈利及派息增加，股東自然雙收。但如今股市淡靜，銀行非利息收入及盈利前景並不樂觀，但內銀仍普遍提供五至七厘息，錢從何來？到底如今應該入市冷手執個熱煎堆，抑或糖衣毒藥生人勿近，看官真係要戙高床板想清想楚！

又講番內房，有官媒發文要提防一線城市房價非理性上漲，更點名指如今深圳樓市中的投資者比例已超過三成，反映房價飛漲顯然是非理性的。似乎，如今內部有兩種聲音，一種係主張放水救樓市以免硬着陸，另一種就係怕放樓市只會如去年救股市般冇好收場。到底救唔救，點樣救，不妨眼盯兩會如何定調。

筆者傾向相信，即使係具爭議性，中央講得出就自然會做得到，內房股短線危與機並存。自問膽生毛冇貨喺手唔安樂，要買啲內房股博一博無頻撲，除咗兩大龍頭股潤地（01109）及中海（00688）外，論走勢亦不妨留意綠城中國（03900），昨日收報6.59元，升5.95%，成交2,436萬元，股價自一月底低位反覆回升，是浪有勢叩7元關阻力位，回吐初步支持在6.2元。