零售業前景依然未明朗，具實力的舖位業主亦理解消費力已大幅回落，故亦配合市況減租尋求新租戶。大鴻輝興業主席梁紹鴻同劉Sir講，旗下尖沙咀廣東道一個由眼鏡店承租嘅舖位即將交吉，現時重新以約150萬元放租，較舊租金低約兩成半，相信係近年條街舖位減租較大嘅一次。

過去數月劈租個案集中在銅鑼灣，惟減租潮已蔓延至尖沙咀廣東道。

大鴻輝梁紹鴻指，旗下廣東道舖位暫未有商戶洽租。（資料圖片）

各區舖位最新市況

核心區舖市減租成風，梁紹鴻同劉Sir講，旗下位於尖沙咀廣東道嘅舖位，而家就由眼鏡店以約200萬元承租，但係眼鏡店已經選擇唔續租，即將搬走。

銅鑼灣地舖低20%租出

該舖位而家以約150萬元重新放租，租金減咗四分之一，因為業主大鴻輝近日發現零售客戶已有所減少，所以都要配合市況下調租金，但暫時仲未有商戶洽租。

劉Sir八到，個舖位喺廣東道54至66號帝國大廈地下，面積約1,300方呎，眼鏡店將會承租至下個月。

另外，劉Sir睇返資料，銅鑼灣又有新劈租個案，區內記利佐治街1號地下4號舖，新近以約112萬元租畀SWATCH，租期至一九年二月底。聽講該舖位原由鞋店承租，面積約900方呎，新租金較舊租金低約兩成。

其實除咗核心區唔掂之外，新界區舖市一樣難頂，原本由藥房承租嘅青山公路元朗段單號地舖，面積約1,120方呎，近日以15.5萬元租出，較舊租低近14%；而上水新康街單號兩幢全幢物業，面積共約4,250方呎，以共約24萬元租出，較舊租僅高出5%。

觀塘工廈拆售速預留

中原商舖部黃泳珊話，尖沙咀金巴利街1J至1H號地舖，面積約1,244方呎，意向價約1億元，呎價近8萬元，原業主喺早年僅以約90萬元購入物業。

該行工商部劉重興話，觀塘萬年工業大廈拆售項目K Star昨推售，首天獲預留約60個單位，佔整體六成，平均呎價約6,800元，其中一位買家大手連購3伙，涉資逾700萬元，另一組買家亦一口氣購8伙，項目呎價最高達7,800元。

商廈方面，金鐘遠東金融中心中層A室，面積約5,400方呎，以呎價約2.9萬元沽出。