上個禮拜五恒指抽升成四百幾點,阿莊都覺得古怪,尋日果然一如所料回調,恒指高開2點之後,在內地股市下跌拖累下,很快便掉頭向下,全日跌252點,收報19,111點,國企指數亦跌117點,收報7,916點,全日成交金額640億元。

高鑫零售積極開拓電商市場,有望成為未來盈利增長動力。(資料圖片)

內地股市下挫,滬綜指跌穿2,700點關口,收報2,687點,深成指跌476點,收報9,097點,跌幅分別2.8%及4.98%,內地股市缺乏承接,加上市場虛怯,一有風吹草動,投資者便爭相走避,令跌勢加劇。

降準效力難寄望

過去兩會舉行在即,市場通常都會有炒作,但今年完全炒唔起,而即使昨日收市後傳來降準消息,但中央放水的效力已一次弱過一次,所以亦不宜有太大期望。

恒指尋日跌穿咗10日同埋20日線,走勢再次轉差,事實上,恒指近日呈上落市格局,上又無力上,跌又好似跌唔落,在18,300至19,500點區間反覆徘徊,所以高追同追沽都制唔過。

尋日隻中國罕王(03788)晏晝畀人殺咗落嚟,最多跌七成五,最後仲停埋牌,停牌前報1.12元,跌幅達65%。阿莊一向唔建議投資者買入此類暴跌股,一來唔知暴跌原因,二來好似罕王停咗牌,都唔知幾時復牌,好彩復到牌的話,分分鐘都要再急跌,既然贏面咁低,都係不沾手為妙,食住花生睇戲好過。

事實上,好多細價股突然急挫,都係牽涉大股東將股份抵押,但係大股東抵押貸款,毋須向港交所(00388)申報,所以小股東無從得知,到股價殺跌時為時已晚,所以港交所及監管機構應盡早制訂措施,以保障小投資者的利益。

高鑫零售(06808)公布一五年度錄得營業額按年增加5%,至964億元人民幣,惟純利倒退15.7%至24.43億元人民幣,年內同店銷售增長為負3.6%,主要由於整體消費市場增長放緩,客戶可用渠道多元化及不同零售渠道之間競爭激烈。

雖然高鑫純利倒退,但股價昨日卻逆市升5.85%,收報4.7元。目前,集團正加大力度投資電商及開實體店,增加了經營成本,拖累去年盈利表現,今年集團將繼續增加在電商的投資額,目標電商佔總收入的比例由去年的1%增加至5%。高鑫昨日上升,成交亦見配合,加上集團發展積極可取,料可支持股價進一步做好,目標可望挑戰5元阻力。