內地股市昨日又「食錯藥」，滬綜指跌穿2,700點關，跌幅2.8%。對此，市場有多個解讀版本，包括人民幣中間價持續下跌，顯示資金未有停止外流；又話中央扶內房變相抽走股市資金；亦有指中證監新官上場，股份註冊制同深港通都不在其首要任務之列，總之理由多多但冇個實在，反正要跌就跌，唔使太多理由！執筆時傳來人行降準的消息，且看能否穩住股市！

A股精要

老實講，中央為房地產市場去庫存的目的，係為金融體系消除一個重大不明朗因素，而攪動房地產投資亦有助帶動相關產業投資，有利經濟回穩。之不過，想起去年中央動手救股市，最終卻演變成之後的瘋牛暴斃收場，如今話要救房地產市場，會唔會又再重蹈覆轍呢？

大價內房股博得過

筆者聽聞春節過後一線城市房地產交易中心逼滿人，似乎大家都在賭中央救樓市，想分一杯羮。難道內地真係逃不出「一放就亂、一亂就收、一收就死、一死再放」的惡性循環！一旦內房泡沫爆破，情況肯定會比250日前的股市爆煲更慘烈！

講到底，內地樓市係要救，但係應該針對高庫存問題改善交投，而唔係製造一個炒作環境畀人有搵快錢的期望。回說炒股，有危才有機，反正依家仍未到最壞時刻，賭佢唔爆的當然從國企背景大價內房股入手，短期將進入業績期，兩會期間的行業政策消息料有助抵銷人民幣貶值的負面影響，暫毋須急於開內房股淡倉。

睇番業績股，光大國際（00257）去年純利20.84億元，按年增長22%，每股盈利46.5仙，末期息每股12仙，連同中期息每股6.5仙，全年合共派息每股18.5仙，息率超過兩厘，班芬佬應該受落。惟昨日遇上跌市，光國股價跌4%，收報8.27元。

「十三五」規劃將進一步加強環保產業發展，而行業專業度日益提高下，市佔率將愈來愈歸邊，即係強者愈強，光國龍頭地位得以鞏固，中長線有望繼續壯大。眼前股價調整可視為吸納機會，在7.5至8.2元區域可分注收集，中線目標反覆上試10元關，失守7元止蝕。