新春過後新盤市場略為回暖,豪宅方面嘅升溫速度明顯較快,億億聲成交陸續湧現。信置(00083)位於大嶼山嘅洋房新盤Botanica Bay,尋日又一口氣以招標形式賣出6座洋房,夾埋成交金額共7.4億元,平均呎價24,837元。另新地(00016)今個月有機會連環開售將軍澳海天晉及何文田天鑄第二期兩大豪宅盤。

新地雷霆(左)表示,本月有機會連推兩個豪宅新盤。旁為陳漢麟。

長實郭子威(左)稱,維港.星岸將加推。旁為曹皎明。

信置大嶼山Botanica Bay以招標形式售出6座洋房。 (資料圖片)

豪宅新盤動向

信置老友尋日同劉Sir報喜,Botanica Bay以招標形式推出嘅第1、2、3、5、6及8號獨立屋全數賣出,夾埋金額7.4億元,當中以第8號獨立屋做價最高,售價1.6445億元,呎價約29,508元,成為項目售價同埋呎價次高洋房,買家可享15%買家印花稅現金回贈,扣除優惠後,折實成交價1.397825億元,呎價約25,082元。

逸瓏灣洋房快登場

信置營業部聯席董事田兆源話,近期超級豪宅交投暢旺,市場屢錄高價成交,Botanica Bay共有16座獨立屋,唔經唔覺已經賣咗12座,套現近15億元。因應市場需求,集團計劃短期內會推售大埔逸瓏灣I及II嘅洋房。

新地副董事總經理雷霆都話,今個月有機會雙盤齊發,其中將軍澳天晉最後一期命名為海天晉,係低密度式豪宅,提供628伙,間隔由一房去到四房,單位種類覆蓋範圍比之前期數更廣,提供唔少特色戶同3座獨立屋,部分單位可望港島海景。

維港.星岸即將加推

雷霆透露,項目示範單位已近完工,目前仲等緊待批出預售樓花同意書,有信心今個月可以開售。同系何文田天鑄第二期都有機會係今個月賣。

長實地產投資董事郭子威話,紅磡維港.星岸兩天內加推30多伙,定價參考早前招標賣出嘅單位,最快下周賣,個盤已攞入伙紙,周六起開放示範戶畀公眾睇。

佢哋仲同渣打銀行合作,為買家提供一按「置慳息」計劃;旗下財務機構就提供樓價三成二按,即首期約樓價兩成。發展商尋日開放5座28樓3個交樓標準戶畀傳媒參觀,實用面積由755至1,358方呎。