近年零售市道唔係好掂，來港過夜旅客數字又跌，打擊咗發展商搞酒店發展嘅意欲，舊年城規會只係收到10份酒店申請，比一四年全年勁減約63%，涉及酒店房間只係1,902間，亦急跌了78%，初步估計舊年酒店申建涉及市值逾93億元，亦比一四年全年少近80%。有測量師話，申請數字直接反映市場走向，酒店已經「無咁值錢」，相信未來會繼續縮水。

來港旅客減少，令發展商申建酒店項目意欲大減。（資料圖片）

酒店規劃申請宗數減少

去年全年過夜旅客人次統計

睇番政府統計處最近公布嘅零售業銷貨額臨時統計數字，舊年全年所有零售商類別嘅零售業銷貨價值有約4,751.6億元，按年減少約3.7%；而據旅發局資料，舊年全年過夜旅客錄超過2,668萬人次，亦按年少約3.9%，其中內地過夜旅客更減少5.7%至約1,800萬人次。

劉Sir覺得，零售數字下滑，旅客少咗，發展商對興建酒店意欲大減，綜合城規會資料及自行統計，舊年全年只收到10宗酒店規劃申請，僅涉1,902間客房，而且規模有限，最大嘅項目係新蒲崗彩虹道210至212號酒店規劃申請，亦只提供約483間客房，葵國瑞路45至51號涉249間客房，其餘申請一般只有數十至百多間客房。

項目總市值縮8成

相比一四年城規會一共收到27宗酒店規劃申請，涉及8,750間客房，舊年全年申請宗數同總客房數目按年激減約63%及約78%。

參考番近年錄得嘅全幢酒店成交，一般平均每間客房價值約300萬至700萬元，部分港島地區每間客房更可達約1,000萬元，照咁推算，舊年10宗酒店申請，總市值逾93億元，相比一四年全年27宗申請，市值料逾452億元，舊年酒店申請所涉市值，將較一四年少近80%。

物業難拆售礙轉手

劉Sir老友，理想城市企業估值部張聖典話，市場酒店申請仲會繼續減少，零售旅遊前景不明朗，酒店規劃申請數字減少，正好反映市場走向。

佢又指，酒店發展有周期性，遇上逆市會「縮得好勁」，特別係酒店持貨成本遠較寫字樓高，最近房租亦出現下跌現象，酒店已經「無咁值錢」，同埋酒店唔可以拆售，亦要考慮將來轉手問題。