新盤市道漸見起色，猴年首個登場嘅上車新盤元朗映御，消息透露，截至尋晚已錄超過900張入票，較禮拜五開售138伙超額認購逾5.5倍，發展商新地（00016）仲話，有機會喺星期六再加推單位應市，仲話樓盤有加價空間。另恒地（00012）嘅馬鞍山迎海第5期迎海．御峰有機會接住登場，最快今個禮拜開價同下周開售。

新地代理張卓秀敏（中）透露，映御住客會所日後會提供國際品牌咖啡，價錢會較市面相宜。左為林青龍。

恒地林達民稱，迎海．御峰首批以中層戶為主。

新界區兩大新盤動態

新地代理業務部總經理張卓秀敏尋日同劉Sir講，映御收票理想，星期一晚以原價加推60伙嘅價單。全數單位分布第2座，實用面積381至423方呎，價單平均呎價11,576元，即供折實平均呎價10,330元，同時落實喺星期五晚開售138伙。

累計2.5萬人參觀

佢仲話，呢批單位價單市值逾5.7億元，價單平均呎價11,368元，即供折實平均呎價10,145元。

佢指出，映御有加價空間，有機會喺周末加推單位，但都會盡量保持以機不可失價推售。

樓盤展覽廳自上周五起開放以嚟，累積已錄逾2.5萬人次參觀。隨住飲咖啡文化愈嚟愈盛行，張卓秀敏透露，為咗方便映御住客，項目會所日後將引入Starbucks咖啡，價錢仲會比市面相宜。

其他新盤方面，恒地營業（一）部總經理林達民話，迎海．御峰嘅示範單位同埋首張價單，最快今個禮拜內推出，首批最少50伙，最快下個禮拜開售，仲話有機會推出頂層特色戶。

佢又話，迎海．御峰設有8伙特色戶，有5伙連泳池，實用面積由1,634去到1,929方呎，分四房雙套同埋五房雙套房兩種間隔，好似9座26樓A室連泳池特色戶，實用面積1,929方呎，泳池有成11.7米咁長。

林達民話考慮為買家提供85%按揭，定價參考市場同類單位同埋項目第3、4期嘅售價，首批以中層為主，定價會貼市。

肇輝臺6號擬轉租

此外，嘉華國際（00173）委託第一太平戴維斯同領域佳士得，成為東半山肇輝臺6號8伙A單位嘅租賃代理。嘉華國際總經理（香港地產）溫偉明話，依家區內呎租做緊大約50元，項目料主要租畀外國人，估計入場實用呎租約40幾元。項目累計賣咗9伙，其他尚餘單位都有機會放租。