肖鋼下台，港匯曾升破7.77，期油亞洲時段重上30美元樓上，加埋「兩會」概念繼續利好大市氣氛，恒指卒之收復猴年失地。雖然滙控（00005）盈利差過預期，但大笨象近年業績已無力左右大局。今年一、二月股市表現就如去年九、十月之翻版，當時亦係人民幣以及油價先大跌後反彈，現時股市都係博呢類無厘頭超賣後之機會。

科網股有業績因素支持，反彈力度普遍勝於舊經濟股。（資料圖片）

太陽日誌 2016/2/23

三月睇落有「兩會」及歐洲加碼量寬兩條柱頂住，但「兩會」主要屬諮詢性質，年年都係開會前例升，一到正式開會就散水，今年有個憧憬係去庫存、去產能，刺激內房股和鋼鐵股近期升得有聲有色。

其實每年「兩會」都有主題，例如新型城鎮化、一帶一路、放寬生育政策等，但全部都係雷聲大、雨點小；今次樓市去庫存會去得較盡，一來樓市係經濟命脈，二來可做的空間較多，近期已有降低首付及交易環節稅徵新政出台，相信仍會陸續有來。

美加息機會重燃

不過，會否收效是另一回事，畢竟相對樓價升跌幅，細微細眼的恩惠不足以改變買樓的決定，昨日內房股反而跑輸大市，中海（00688）及潤地（01109）跌幅僅次於滙控。

鋼鐵股表現較似樣，但去產能幾乎年年都列為重要工作，只是今年有「供給側改革」呢個口號，似乎顯示有較大決心。但去產能牽涉大量職工下崗問題，就如禁煙亦要考慮煙草業利益、稅收等複雜因素，如果話cut就cut，唔使搞到咁多年一事無成。至於歐洲加碼量寬亦有去年底「反高潮」之鑒，美國核心通脹升破2%目標，隨時又令加息機會重燃，而業績期盈警十居其八，散戶高追難免心驚驚，故港股成交金額縮到約600億元。

周末最大新聞係肖鋼革職，自取消熔斷之後個多月先人頭落地，中央不知葫蘆賣甚麼藥。給股民消消氣也好，新官上任三把火也好，滬綜指昨日升逾2%，照計3,000點已由支持位變成阻力位，但借「兩會」威力，短期衝一衝並非冇可能。肖鋼留低的手尾，例如深港通、IPO註冊制都事在必行，但關鍵仍在是否退市？劉士余會唔會腳頭好，帶A股入MSCI呢？

滙控不但冇減派息，仲派多1美仙畀股東，但無私顯見私，股價再穿50蚊，惟倫敦滙控先急跌後反彈。中國大媽投資在滙控身上超過100億元，派幾多息都補唔番。不過，同日放榜的另兩隻高息股恒生（00011）和新創建（00659）則做好。買股收息現時仍係好時機，但銀行股現時青黃不接，開展新業務受監管掣肘，傳統放貸業務亦受互聯網金融等威脅前景，惟有靠縮皮支持盈利，低增長故低PE。恒生在賣興業銀行打了漂亮一仗，但股價相對同業實在偏高。

安踏防獲利回吐

今日派成績表有新世界發展（00017）、思捷（00330）、安踏（02020）以及渣打（02888）等，安踏炒業績亦成慣例，但近月每升到20蚊關口就受壓，提防獲利回吐。舊經濟股與新經濟股相比之下，始終係有波幅、冇升幅，昨日科通芯城（00400）及慧聰網（02280）分別升9.7%及9%，科網股一五年普遍業績不俗，且勝在反彈力度較強，又係時候短線走一轉。

金蝶（00268）向來是散戶之心水，2.5元水平支持力甚強，形成「三底」；中軟國際（00354）過去個多月在2.5至2.8元之間上落。兩間公司一五年市盈率均約20倍左右，有魚與熊掌之感。不過，金蝶及中軟去年上半年分別多賺12.4%及37.9%，前者無疑基數較高，但中軟亦予投資者增長較快的感覺，若突破2.8元阻力可看高一線。

中軟去年十月以每股2.8元配股予華為，近日亦發行7,000萬美元可換股票據，但因股價回落，故換股價降至每股3元。集團截至去年六月底止員工總數達27,847人，同比升16%，僱員半年薪酬為15億元人民幣，相當於中期盈利的10倍有多，假如員工加薪一成，利潤便會化為烏有，亦相當於每名員工為公司每年賺約1萬元人民幣。

集團近年宣揚其「解放平臺」可提高人員利用率，但至今尚未見有太大改善，惟可解釋與華為合作拓展業務需再增加人手，未來的效率水平能否提高將是關鍵，可塑性空間仍較大。