中證監徇眾要求易帥，滬綜指以高收作回應。舊年A股搞到一鑊粥，今年初又搞個熔斷爛尾，作為部門阿頭，起身亦都好正常，只係阿爺做嘢有佢嗰套，冇話你哋叫佢退就要立即退，咁有得一次有第二次，仲得了？所以分析內地事件，也要熟知國情，才能明白事態發展。

A股精要

人事變動透露玄機

兩會前夕，愈來愈多政策消息出現，板塊不愁炒作藉口。好似關於樓市去庫存，市傳將有更多省份出招響應中央政策。事實上，以福建為例，截至去年底，地產業庫存達7,500多萬平方米，去化周期約26個月，且集中在二、三、四線城市，搞不好的話，對地方經濟影響不少，且看兩會陸續公布的相關消息，能否令投資者加強政府為內房市場拆彈的信心。

A股市場猴年首批新股今日開始申購，有中證監易帥的利好消息頂住，顯見阿爺做嘢都好識揀時間。筆者認為，依近期中央的思路部署，兩會前股市可望持續回穩，可順勢睇實在港上市的中資股。昨日提及的東風（00489）屬穩陣之選，另電動車股亦有異動，電池股比亞迪電子（00285）、充電樁股泰坦（02188）均升逾一成，早前推介的比亞迪股份（01211）對辦，高位見38.45元，一於繼續坐順風車！

另留意到紅籌股香港中旅（00308）宣布高層人事變動，原公司主席因須投放更多時間在母公司而辭任，改由公司總經理出任主席。基本上，都是原體系內的人事變動，但焦點在於由落手落腳熟悉酒店旅遊等業務運作的高管坐正主席一位，相信有助中旅加快推進「走出去」戰略，會否透過重組，更佳體現旗下酒店資產價值，值得期待。

中旅股價由去年末季高位3.8元水平反覆回落，再次成功考驗了2.5元水平的承接力。依家環球經濟氣氛唔好，唔多唔少影響到旅遊行業景氣。不過，中旅勝在資產價值尚未完全展現，現價市帳率一倍都冇，截至去年中淨現金有32億元，息率有四厘多，相信「十三五」期間內地旅遊板塊點都有番啲嘢睇吓，到時唔會少得中旅一份！