今年全球金融市場嚇到股民尖叫，港股亦由高位急跌了幾千點，不少股票價格跌到「心動價」，連帶同學們亦心郁郁想低撈幾手。咪住！人稱「榮哥」的科技大學人氣教授蕭錦榮卻叫學生們不要炒股，提醒有些事比炒股更賺錢！

科技大學商學院商學教育助理教授蕭錦榮（右二）指，慳錢是必須，而大學生努力讀書令將來的收入增加才是王道。

三位大學生理財習慣 Kenneth：月入過萬 兩千買股輪投資較進取的Kenneth每月收入過萬元，他說：「我每個星期教兩三堂壁球，同埋喺金融公司做兼職，扣除使費，我每月會儲三千蚊，再用二千蚊去投資，會投資股票同窩輪。」

三位大學生理財習慣 Kenickie：每月儲逾千元零用錢剛進大學不夠半年的Kenickie則沒有任何收入，他說：「我無做兼職賺錢，亦無咩投資，每月會儲起千幾蚊零用錢。」

三位大學生理財習慣 Tommy：獎學金投資 家人代勞 Tommy學業成績彪炳，今年獲8萬元獎學金，他說：「扣咗學費，仲有3萬8千蚊，通常用嚟去旅行，剩咗就畀媽咪幫我保管。媽咪幫我買咗港交所（00388）同民生銀行（01988）！我好放心畀佢幫我投資。」

香港科技大學商學院商學教育助理教授蕭錦榮，親自傳授三位科大工商管理學生入世的理財課，期間更自爆個人炒輪曾輸足九成，有血有淚！

三位大學生首先分享理財習慣，榮哥聽畢後，對於一年級生陳俊聲（Kenickie）及二年級生王瑋棋（Tommy）從沒投資經驗，毫不驚訝，更笑指，「我自己都係讀碩士臨畢業嗰陣先第一次買股票！」至於像二年級生謝文浩（Kenneth）般有豐富投資經驗的學生，教授反表示擔心，追問後更得悉Kenneth是在○八年股災後才入市，然後說：「我好怕後生仔無咩經歷過大股災，頭幾次投資就嘗到甜頭。唔知係因為股市好，定係真係選股能力高！如果係前者，我怕佢哋會喺跌市時輸得好慘。」

基本步首要懂儲蓄

「有錢先有得諗理財，所以儲錢係非常重要。」蕭錦榮說。Kenickie與Tommy的收入全交由母親管理，Kenickie指，「我畀晒啲利是錢媽咪，佢每個月就會畀番啲生活費我，我會慳住使！」而成績彪炳的Tommy的主要收入來自獎學金，他會用一部分交學費，其餘的也交由母親保管。

榮哥讚揚他們有正確的儲錢觀念。他亦以自身做例子，「我好努力慳錢，仲可以慳到好狼！住屋企、住劏房或者同人夾分租住，對我來講，都無咩問題！做學生，學識儲錢好緊要。」

借錢讀書勝做兼職

那麼，如何投資最賺錢？蕭錦榮回答：「識投資，梗係首要投資落自己度！學生只要做好本分，努力讀書，將來會獲得更高收入。」他反指，因做兼職影響學業，代價實在太大。教授就幫Tommy做了簡單的計算，若兼職補習一個月賺3,000元，那一年就賺36,000元；但專注讀書，成功被投行聘用，月薪將比普遍大學生的平均薪酬高出數萬元。

他建議學生們不要做兼職賺錢，更指借錢讀書也無所謂。「學生貸款好低息，宜家借錢，投資落自己度，相信佢哋之後可以賺番，仲有錢剩添！」

他另稱，投資的目的也應是為了學習，而不是賺錢。「我讀書嗰陣買股票，唔係為咗賺錢，而係畀個動機自己學習。買股票係好複雜嘅判斷，唔係讀幾本書就夠。」

透過買股票，可訓練市場觸覺，「單睇今年嘅投資環境，如港交所（00388）主席周松崗所言，起碼要留意3C，即匯率（Currency）、商品（Commodity）價格同中國（China）的經濟。所以買股票不簡單。」他補充，學投資需要交學費，特別因學生的資本不多，小額投資會蝕了手續費，且無法分散投資；同時，投資經驗少，更大大增加選錯股的風險。

評估風險承受能力

他續指，用實錢投資前，調校好投資心態及了解自己的風險承受能力，能增加勝算。他指各人風險偏好不同，如Kenickie用虛擬資金來投資，也顯得非常緊張，所以他未必適合高風險投資，「記得投資最忌感覺差！我一直都唔鍾意用槓桿，幾年前輸過一次窩輪，輸咗九成！我話過，以後都唔再買窩輪！」

他總結了四樣大學生應做的投資，包括學業、分析能力、健康及人際關係。「努力學習，令今日嘅你比昨日嘅你強！亦要有開放思維、宏觀視野，分析國內外新聞，建立世界觀。而學生也應該善用大學嘅設備，例如考慮住宿，學習與人相處。最後，訓練好自己嘅體魄，有健康就會有財富！」

寫下大計齊增值

聽完教授分享投資於自己身上的重要性，當然要三位大學生坐言起行，寫下投資大計！Kenneth說：「我每月會讀三本書，分別係投資工具書、文學同英文書。」Kenickie說：「我會學點分析股票！」Tommy說：「我會學多種外語。」